തിരുവനന്തപുരം: കേരള പ്രീമിയര്‍ ലീഗിലെ നിര്‍ണായക പോരാട്ടത്തില്‍ എസ്.ബി.ഐയോട് ഒറ്റ ഗോളിന് പരാജയപ്പെട്ട് കേരള പൊലിസ് പുറത്ത്. വിജയിച്ചാല്‍ സെമിയിലെത്തുമായിരുന്ന മത്സരത്തിലാണ് പൊലിസിന് തോല്‍വി പിണഞ്ഞത്. ആദ്യ പകുതി ഗോള്‍രഹിതമായപ്പോള്‍ 82ാം മിനുട്ടില്‍ സജിത് പൗലോസ് നേടിയ ഒറ്റ ഗോളിലാണ് എസ്.ബി.ഐ വിജയം സ്വന്തമാക്കിയത്. ഇടവേളയില്‍ എസ്.ബി.ഐ പത്ത് പേരായി ചുരുങ്ങിയിട്ടും പൊലിസിന് അവസരം മുതലാക്കാന്‍ സാധിക്കാതെ പോയി. മത്സരത്തില്‍ വിജയിച്ചെങ്കിലും എസ്.ബി.ഐ സെമിയിലെത്താതെ നേരത്തെ പുറത്തായിരുന്നു.
എഫ്.സി തൃശൂരിന് 18ഉം കേരള പൊലിസിന് 17ഉം പോയിന്റുകളാണുള്ളത്. എസ്.ബി.ഐ വിജയിച്ചതോടെ എഫ്.സി തൃശൂര്‍ സെമി ബര്‍ത്ത് ഉറപ്പിച്ചു. നാളെയാണ് സെമി പോരാട്ടങ്ങള്‍. ആദ്യ സെമിയില്‍ ഗ്രൂപ്പ് എ ചാംപ്യന്‍മാരായ ഗോകുലം എഫ്.സി ഗ്രൂപ്പ് ബിയിലെ രണ്ടാം സ്ഥാനക്കാരായ എഫ്.സി തൃശൂരിനേയും രണ്ടാം സെമിയില്‍ ഗ്രൂപ്പ് ബി ചാംപ്യന്‍മാരായ സാറ്റ് തിരൂര്‍ ഗ്രൂപ്പ് എയിലെ രണ്ടാം സ്ഥാനക്കാരായ കെ.എസ്.ഇ.ബിയേയും നേരിടും. സെമി പോരാട്ടങ്ങള്‍ നാളെ തിരൂര്‍ മുന്‍സിപ്പല്‍ സ്റ്റേഡിയത്തിലും തൃശൂര്‍ കോര്‍പറേഷന്‍ സ്റ്റേഡിയത്തിലും നടക്കും. ഈ മാസം 31ന് മലപ്പുറം കോട്ടപ്പടി സ്റ്റേഡിയത്തിലാണ് ഫൈനല്‍ പോരാട്ടം.