കൊണ്ടോട്ടി: ബസില്‍ നിന്നിറങ്ങുകയായിരുന്ന സ്ത്രീയുടെ ബാഗില്‍ നിന്ന് സ്വര്‍ണം മോഷ്ടിച്ച് കടന്നുകളയാന്‍ ശ്രമിച്ച തമിഴ് യുവതി പിടിയില്‍. തമിഴ്‌നാട് ദിണ്ഡിഗലില്‍ മാരിയമ്മന്‍ കോവില്‍ തെരുവില്‍ മുനിയമ്മ(34)ആണ് സ്വര്‍ണം മോഷ്ടിക്കാനുള്ള ശ്രമത്തിനിടെ പിടിയിലായത്.
   കോഴിക്കോട് നിന്ന് മഞ്ചേരിയിലേക്ക് പോവുകയായിരുന്ന സ്വകാര്യബസ് കൊണ്ടോട്ടി ബസ് സ്റ്റാന്‍ഡിലെത്തിയപ്പോഴാണ് സംഭവം. രണ്ട് വയസുളള കുട്ടിയുമായി യുവതി ബസില്‍ നിന്ന് ഇറങ്ങുന്നതിനിടെ ഇവരുടെ ഹാന്റ് ബാഗിനകത്തുണ്ടായിരുന്ന ആഭരണങ്ങള്‍ തമിഴ് യുവതി എടുക്കുകയായിരുന്നു.
38 ഗ്രാം വരുന്ന നാലു വളകളായിരുന്നു ബാഗിലുണ്ടായിരുന്നത്. സ്വര്‍ണം മോഷ്ടിക്കുന്നത് ശ്രദ്ധയില്‍പ്പെട്ട യാത്രക്കാരി ബഹളം വെച്ചതോടെ മുനിയമ്മ ഓടി രക്ഷപ്പെടാന്‍ ശ്രമിക്കുകയായിരുന്നു.യാത്രക്കാരും ബസ്സ്റ്റാന്‍ഡിലെ പൊലിസും ചേര്‍ന്ന് ഇവരെ പിടികൂടുകയായിരുന്നു. പുളിക്കലില്‍ നിന്നാണ് ഇവര്‍ ബസില്‍ കയറിയത്. പൊലിസ് അറസ്റ്റ് ചെയ്ത ഇവരെ പിന്നീട് കോടതിയില്‍ ഹാജരാക്കി റിമാന്റ് ചെയ്തു.