ആലക്കോട്: കൃഷിഭവന്‍ മുഖേനയുള്ള നാളികേര സംഭരണം നിര്‍ത്തലാക്കിയതോടെ കേര കര്‍ഷകര്‍ ദുരിതത്തില്‍. പൊതു മാര്‍ക്കറ്റില്‍ നാളികേരത്തിന്റെ വില താഴ്ന്നത് കര്‍ഷകര്‍ക്ക് തിരിച്ചടിയായി.
ഒരു കിലോ നാളികേരത്തിന് 32 രൂപ നിരക്കില്‍ കഴിഞ്ഞ യു.ഡി.എഫ് സര്‍ക്കാര്‍ കൃഷിഭവന്‍ മുഖേന നാളികേരം സംഭരിച്ചിരുന്നു. പൊതു മാര്‍ക്കറ്റില്‍ ഇരുപതു രൂപ ഉണ്ടായിരുന്ന സമയത്ത് സര്‍ക്കാരിന്റെ നടപടി കേര കര്‍ഷകര്‍ക്ക് ആശ്വാസമായിരുന്നു. ഈ ഇനത്തില്‍ കോടിക്കണക്കിന് രൂപ കര്‍ഷകര്‍ക്ക് നല്‍കാന്‍ ബാക്കി വച്ചാണ് ഉമ്മന്‍ചാണ്ടി സര്‍ക്കാര്‍ സ്ഥാനം ഒഴിഞ്ഞത്. ഇടതു മുന്നണി സര്‍ക്കാര്‍ അധികാരത്തില്‍ വന്നതോടെ കുടിശ്ശിക ഇനത്തില്‍ കര്‍ഷകര്‍ക്ക് നല്‍കാനുള്ള തുക കൊടുത്തു തീര്‍ത്തെങ്കിലും കഴിഞ്ഞ ഒക്ടോബറോടെ സംഭരണം നിര്‍ത്തലാക്കി. സംഭരണത്തിനായി യു.ഡി.എഫ് സര്‍ക്കാര്‍ നിയമിച്ച താല്‍ക്കാലിക ജീവനക്കാരെ പുതിയ സര്‍ക്കാര്‍ പിരിച്ചു വിടുകയും ചെയ്തതോടെ സംഭരണമെന്ന പ്രതീഷ അസ്തമിച്ചു.
പൊതു മാര്‍ക്കറ്റില്‍ വില കൂടിയതാണ് സംഭരണം നിര്‍ത്താന്‍ കാരണമായതെന്നായിരുന്നു സര്‍ക്കാരിന്റെ വിശദീകരണം. എന്നാല്‍ സംഭരണം നിലച്ചതോടെ പൊതു മാര്‍ക്കറ്റിലെ വില കിലോയ്ക്ക് 29 രൂപ എന്ന നിരക്കിലേക്ക് ഒതുങ്ങി. റബറിന്റെ വിലത്തകര്‍ച്ച ഉള്‍പ്പെടെ കാര്‍ഷിക മേഖലയില്‍ ഉണ്ടാക്കിയ പ്രതിസന്ധിയില്‍ ഉഴലുന്ന കര്‍ഷകര്‍ക്ക് ഏറെ ആശ്വാസകരമായിരുന്നു നാളികേര സംഭരണം. കടക്കെണിയില്‍ പെട്ട് ജീവിതത്തിന്റെ രണ്ടറ്റം കൂട്ടിമുട്ടിക്കാന്‍ ഏറെ പാടുപെടുന്നവര്‍ക്ക് നാളികേര സംഭരണത്തിലൂടെയെങ്കിലും ആശ്വാസം നല്‍കാന്‍ സര്‍ക്കാര്‍ തയാറാകണമെന്നാണ് കര്‍ഷകരുടെ ആവശ്യം.