കോഴിക്കോട്: കാഞ്ഞങ്ങാട് പഴയകടപ്പുറത്ത് കൊല്ലപ്പെട്ട എസ്.എസ്.എഫ് പ്രവര്‍ത്തകനായ ഔഫ്് അബ്ദുറഹ്മാനെ സി.പി.എം പാര്‍ട്ടി രക്തസാക്ഷിയാക്കി രാഷട്രീയ മുതലെടുപ്പ് നടത്തിയെന്ന് ആരോപണവുമായി കാന്തപുരം വിഭാഗം. കാഞ്ഞങ്ങാട് പട്ടാക്കല്‍ വാര്‍ഡില്‍ ഇടതുപക്ഷത്തിനു വേണ്ടി തദ്ദേശ സ്വയംഭരണ തിരഞ്ഞെടുപ്പില്‍ പ്രവര്‍ത്തിച്ചിരുന്നെങ്കില്‍ ഔഫ് കാന്തപുരം വിഭാഗത്തിന്റെ സജീവ പ്രവര്‍ത്തകനായിരുന്നു. ഫൗസിയ ശാഫി എന്ന ഐ.എന്‍.എല്‍ സ്ഥാനാര്‍ത്ഥിക്കു വേണ്ടിയാണ് ഈ തിരഞ്ഞെടുപ്പില്‍ ഔഫ് പ്രവര്‍ത്തിച്ചത്. എന്നാല്‍ ഔഫ് കൊല്ലപ്പെട്ടപ്പോള്‍ സി.പി.എം രാഷട്രീയ മുതലെടുപ്പിനായി കൊലപാതകത്തെ ഉപയോഗപ്പെടുത്തിയെന്നതാണ് കാന്തപുരം വിഭാഗത്തിലെ ചിലരുടെ പരാതി. മയ്യിത്തിനെ ചുവപ്പ് പതാക പുതപ്പിച്ചതും ഡി.വൈ.എഫ്.ഐയുടെ പേര് പതിച്ച ആംബുലന്‍സില്‍ കൊണ്ടുവന്നു രക്തസാക്ഷിയെപോലെ മുദ്രാവാക്യം വിളിച്ച് അന്ത്യോപചാരം അര്‍പിച്ചതും ഒരു മത സംഘടനക്ക് അംഗീകരിക്കാനാവില്ലെന്നും സജീവ പാര്‍ട്ടി പ്രവര്‍ത്തകനല്ലാത്തെ ഔഫിന്റെ മരണം സി.പി.എം രാഷട്രീയ ലക്ഷ്യത്തിനായി ഉപയോഗപ്പെടുത്തിയെന്നുമാണ് പ്രധാനമായ വിമര്‍ശനം.

എസ്.വൈ.എസ് (കാന്തപുരം വിഭാഗം) നേതാവായ മുഹമ്മദലി കിനാലൂര്‍ തന്നെ ഈ വിഷയത്തില്‍ സി.പി.എമിനെതിരേ ശക്തമായ വിമര്‍ശനവുമായി ഫെയ്‌സ്ബുക്കിലൂടെ രംഗത്ത് വന്നിട്ടുണ്ട്. കൊല്ലപ്പെട്ടത് സുന്നി പ്രവര്‍ത്തകന്‍ മാത്രമാണെന്നും ഔഫിന് മരണാനന്തരമുള്ള അവകാശങ്ങളില്‍ ചിലത് നിഷേധിക്കപ്പെട്ടുവെന്നും നൂറു ചുകപ്പന്‍ അഭിവാദ്യങ്ങള്‍ക്ക് നടുവില്‍ ചുവപ്പ് കൊടി നെഞ്ചിലേറ്റി വാങ്ങി കിടക്കേണ്ടവനായിരുന്നില്ല ഔഫെന്നും മുഹമ്മദലി കുറിപ്പില്‍ പറഞ്ഞു. അവന്‍ സുന്നി പ്രവര്‍ത്തകന്‍ മാത്രമായിരുന്നു, ചോരച്ചാലുകള്‍ നീന്തിക്കടന്ന പ്രസ്ഥാനത്തിലെ കണ്ണി ആയിരുന്നില്ല, അവനെ മരണാനന്തരം സി.പി.എം ആക്കിയ ബുദ്ധി ഏത് പാര്‍ട്ടി നേതാവിന്റേതാണ് എന്നറിയില്ല, മയ്യിത്തുകള്‍ക്ക് മെമ്പര്‍ഷിപ് നല്‍കുന്ന ലോകത്തിലെ ആദ്യത്തെ പാര്‍ട്ടി എന്ന 'ബഹുമതി' ഡി.വൈ.എഫ്.ഐക്കും സി പി എമ്മിനുമിരിക്കട്ടെ. കൊല്ലപ്പെട്ട ഔഫിനോട് നിങ്ങള്‍ കാണിച്ച നെറികേടിനെ ശക്തമായി അപലപിക്കുന്നുവെന്നും കുറിപ്പില്‍ പറയുന്നു.

[playlist type="video" ids="916432"]

കൊലപാതകത്തെ തുടര്‍ന്ന് എസ്.എസ്.എഫിന്റെ നേതൃത്വത്തില്‍ സംസ്ഥാനത്തിന്റെ പല ഭാഗങ്ങളിലും നടന്ന പ്രതിഷേധത്തിലും സി.പി.എമിനെതിരേ പ്രതിഷേധമുണര്‍ന്നിട്ടുണ്ട്. സുന്നി പ്രവര്‍ത്തകനായ ഔഫിനെ പാര്‍ട്ടി രക്തസാക്ഷിയാക്കി മാറ്റുന്നത് അംഗീകരിക്കാനാവില്ലെന്നാണ് ഇവരും പറയുന്നത്.

അതേ സമയം മുസ്ലിംയൂത്ത്‌ലീഗ് സംസ്ഥാന അധ്യക്ഷന്‍ പാണക്കാട് മുനവ്വറലി ശിഹാബ് തങ്ങള്‍ ഔഫിന്റെ വീട്ടിലെത്തിയത് അല്‍പമെങ്കിലും ആശ്വാസമായി. കൊലപാതക ആരോപണം നേരിടുന്ന പാര്‍ട്ടിയുടെ സംസ്ഥാന നേതാവ് തന്നെ കൊല്ലപ്പെട്ട വ്യക്തിയുടെ വീട്ടില്‍ എത്തുകയും സാന്ത്വനിപ്പിക്കുകയും ചെയ്തത് പുതിയ ചരിത്രമായിമാറുകയും ചെയ്തു. ഈ കൊലപാതകത്തില്‍ മുസ്‌ലിം ലീഗ് ഖേദം പ്രകടിപ്പിക്കുകയാണെന്നും പ്രതികളെ സംരക്ഷിക്കുന്ന നിലപാട് ഒരിക്കലും ലീഗ് സ്വീകരിക്കുകയില്ലെന്നും കുടുംബത്തിന്റെ വേദനയില്‍ പങ്ക് ചേരുന്നെന്നും തങ്ങള്‍ അറിയിക്കുകയും ചെയ്തു. കേസില്‍ ഒന്നാം പ്രതിയായി പൊലീസ് അറസറ്റു ചെയ്ത ഇര്‍ഷാദിനെ കാഞ്ഞങ്ങാട് മുന്‍സിപ്പല്‍ യൂത്ത് ലീഗ് സെക്രട്ടറി സ്ഥാനത്ത് നിന്ന് നീക്കം ചെയ്തതായി യൂത്ത്‌ലീഗ് കമ്മറ്റിയും കഴിഞ്ഞ ദിവസം അറിയിച്ചിരുന്നു.