ടെഹ്‌റാൻ: ഇസ്റഈൽ ഭരണകൂടം തുടങ്ങിവെച്ച സംഘർഷം ഇറാൻ അവസാനിപ്പിക്കുമെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഗർ ഗാലിബാഫ് പ്രഖ്യാപിച്ചു. ഇസ്റഈലിന്റെ സൈനിക ആക്രമണങ്ങളിൽ ഇറാന്റെ നടാൻസ് ആണവ കേന്ദ്രത്തിന് നാശനഷ്ടം സംഭവിച്ചതിന്റെ പശ്ചാത്തലത്തിലാണ് ഇറാന്റെ ശക്തമായ പ്രതികരണം.

“സയണിസ്റ്റ് ഭരണകൂടത്തിന്റെ ക്രൂരമായ ആക്രമണങ്ങൾ മനുഷ്യരാശിയുടെയും ഇറാന്റെയും ഏറ്റവും വലിയ ശത്രുവാണെന്ന് വ്യക്തമാക്കുന്നു,” ഗാലിബാഫ് പറഞ്ഞു. “ഇറാന്റെ വീരന്മാരുടെ രക്തം കൊണ്ട് സയണിസ്റ്റുകളുടെ കൈകൾ കറ പിടിച്ചിരിക്കുന്നു. പ്രതികാരത്തിന്റെ സമയമാണിത്. ഞങ്ങൾ അവരെ വെറുതെ വിടില്ല. കനത്ത പ്രഹരം ഏൽപ്പിക്കും. അവർ തുടങ്ങിയ ഈ കഥ ദൈവേച്ഛ പ്രകാരം ഞങ്ങൾ അവസാനിപ്പിക്കും,” അദ്ദേഹം വ്യക്തമാക്കി.

ഇറാന്റെ ആണവോർജ്ജ സംഘടനയുടെ വക്താവ് ബെഹ്‌റൂസ് കമാൽവണ്ടി, ഇസ്ഫഹാനിലെ നടാൻസ് ആണവ കേന്ദ്രത്തിന് ഉപരിപ്ലവമായ നാശനഷ്ടങ്ങൾ മാത്രമാണ് സംഭവിച്ചതെന്നും ഖോം പ്രവിശ്യയിലെ ഫോർഡോ യുറേനിയം സമ്പുഷ്ടീകരണ കേന്ദ്രം സുരക്ഷിതമാണെന്നും അറിയിച്ചു. “നടാൻസ് സൈറ്റിനുള്ളിൽ രാസ-റേഡിയേഷൻ മലിനീകരണം കണ്ടെത്തിയിട്ടുണ്ടെങ്കിലും അത് പുറത്തേക്ക് വ്യാപിച്ചിട്ടില്ല. മാലിന്യ നിർമാർജനം നടത്തേണ്ടതുണ്ട്,” അദ്ദേഹം പറഞ്ഞു.

ഇന്ന് പുലർച്ചെ ടെഹ്‌റാനിലെ ജനവാസ കേന്ദ്രങ്ങളിലും ഇറാന്റെ വിവിധ ഭാഗങ്ങളിലും ഇസ്റഈൽ നടത്തിയ വ്യോമാക്രമണത്തിൽ ഇറാനിയൻ സായുധ സേനയുടെ ചീഫ് ഓഫ് സ്റ്റാഫ് മേജർ ജനറൽ മുഹമ്മദ് ഹൊസൈൻ ബഖേരി, ഇസ്ലാമിക് റെവല്യൂഷൻ ഗാർഡ്‌സ് കോർപ്‌സ് കമാൻഡർ മേജർ ജനറൽ ഹൊസൈൻ സലാമി, ഖതം അൽ-അൻബിയ സെൻട്രൽ ആസ്ഥാനത്തിന്റെ കമാൻഡർ മേജർ ജനറൽ ഗോലം അലി റാഷിദ്, ഐആർജിസി എയ്‌റോസ്‌പേസ് ഫോഴ്‌സ് കമാൻഡർ മേജർ ജനറൽ അമീർ അലി ഹാജിസാദെ, ആറ് ആണവ ശാസ്ത്രജ്ഞർ എന്നിവർ വീരമൃത്യു വരിച്ചു.

നടാൻസ് ആണവ കേന്ദ്രം സന്ദർശിച്ച ഇറാന്റെ ആണവോർജ്ജ സംഘടനയുടെ തലവൻ മുഹമ്മദ് എസ്ലാമി, ആക്രമണത്തിൽ കേന്ദ്രത്തിന് ഉപരിപ്ലവ നാശനഷ്ടങ്ങൾ മാത്രമാണ് സംഭവിച്ചതെന്ന് സ്ഥിരീകരിച്ചു. “ഈ ക്രൂരമായ ആക്രമണത്തിലൂടെ സയണിസ്റ്റ് ഭരണകൂടം തങ്ങൾക്ക് വേദനാജനകമായ വിധി ഒരുക്കിയിരിക്കുന്നു,” അയത്തുള്ള ഖമേനി മുന്നറിയിപ്പ് നൽകി. ഇറാന്റെ സായുധ സേന അവസാന ശ്വാസം വരെ രാജ്യത്തെ സംരക്ഷിക്കുമെന്ന് ഗാലിബാഫ് ഉറപ്പിച്ചു. സംഘർഷം കൂടുതൽ രൂക്ഷമാകുന്ന സാഹചര്യത്തിൽ ഇറാന്റെ തുടർനടപടികൾ ആഗോളതലത്തിൽ ശ്രദ്ധ നേടുന്നു.