ന്യൂഡൽഹി: മിഡിൽ ഈസ്റ്റിൽ ഇസ്റഈൽ - ഇറാൻ സംഘർഷം രൂക്ഷമായതിനാൽ ആഗോള എണ്ണവില കുതിച്ചുയർന്നെങ്കിലും, ഇന്ത്യയ്ക്ക് വരും മാസങ്ങളിൽ ആവശ്യമായ ഊർജ വിതരണം ഉറപ്പാണെന്ന് കേന്ദ്ര പെട്രോളിയം മന്ത്രി ഹർദീപ് സിംഗ് പുരി. ലോകത്തിലെ മൂന്നാമത്തെ വലിയ എണ്ണ ഇറക്കുമതിക്കാരനും നാലാമത്തെ വലിയ പ്രകൃതിവാതക വാങ്ങുന്ന രാജ്യവുമായ ഇന്ത്യ, ഊർജ ലഭ്യത, താങ്ങാനാവുന്ന വില, സുസ്ഥിരത എന്നിവയെ അടിസ്ഥാനമാക്കിയാണ് തന്ത്രങ്ങൾ രൂപീകരിച്ചിരിക്കുന്നതെന്ന് മന്ത്രി വ്യക്തമാക്കി.

എക്‌സിൽ പങ്കുവെച്ച ഒരു പോസ്റ്റിലാണ്, എണ്ണ വ്യവസായ മേഖലയിലെ പ്രമുഖരുമായി ഊർജ ലഭ്യത സംബന്ധിച്ച് നിരന്തരം അവലോകനം നടത്തുന്നുണ്ടെന്ന് പുരി അറിയിച്ചത്."ഇന്ത്യയുടെ ഊർജ തന്ത്രം ലഭ്യത, താങ്ങാവുന്ന വില, സുസ്ഥിരത എന്നിവയെ വിജയകരമായി സന്തുലിതമാക്കി രൂപപ്പെടുത്തിയിരിക്കുന്നു. വരും മാസങ്ങളിലേക്ക് ആവശ്യമായ ഊർജ വിതരണം ഞങ്ങളുടെ കൈവശമുണ്ട്," മന്ത്രി കുറിപ്പിൽ പറഞ്ഞു.

ഇസ്റഈൽ - ഇറാൻ സംഘർഷത്തെ തുടർന്ന് ബ്രെന്റ് ക്രൂഡ് ഓയിലിന്റെ വില 10 ശതമാനത്തിലധികം ഉയർന്നെങ്കിലും, പിന്നീട് നേരിയ കുറവോടെ ബാരലിന് 75 ഡോളറിനടുത്താണ് വ്യാപാരം നടക്കുന്നത്. കഴിഞ്ഞ വർഷത്തെ അപേക്ഷിച്ച് എണ്ണവില 10 ശതമാനത്തിലധികം കുറവാണെങ്കിലും, 2022-ലെ റഷ്യ-ഉക്രെയ്ൻ യുദ്ധത്തിന് ശേഷം ബാരലിന് 100 ഡോളർ എന്ന നിരക്കിനേക്കാൾ വളരെ താഴെയാണ് നിലവിലെ വില.

ഇന്ത്യ അസംസ്കൃത എണ്ണ ആവശ്യത്തിന്റെ 85 ശതമാനവും പ്രകൃതിവാതക ആവശ്യത്തിന്റെ 50 ശതമാനവും ഇറക്കുമതി ചെയ്യുന്നു. ഇതിൽ 40 ശതമാനത്തിലധികം എണ്ണയും പകുതി വാതകവും മിഡിൽ ഈസ്റ്റിൽ നിന്നാണ്. ഇന്ത്യയിലെ ഏറ്റവും വലിയ എണ്ണ വിതരണക്കാരൻ റഷ്യയും, പ്രകൃതിവാതക വിതരണക്കാരൻ ഖത്തറുമാണ്. പെട്രോൾ, ഡീസൽ, വളം, വൈദ്യുതി, വാഹനങ്ങൾ, പൈപ്പ് ലൈൻ വഴിയുള്ള പാചക വാതകം എന്നിവയ്ക്കായി ഈ ഊർജ സ്രോതസ്സുകൾ ഉപയോഗിക്കുന്നു.