ടെൽ അവീവ്: ഇറാനിൽ വീണ്ടും ഇസ്റാഈൽ ആക്രമണമെന്ന് റിപ്പോർട്ട്. ടെഹ്റാനിൽ ശക്തമായ സ്ഫോടന ശബ്ദങ്ങൾ കേട്ടതായി വാർത്തകൾ. ഇറാന്റെ തിരിച്ചടിക്ക് പിന്നാലെ നടന്ന ഈ ആക്രമണം മേഖലയിൽ സംഘർഷം രൂക്ഷമാക്കി. അതിനിടെ, യെമനിൽ നിന്ന് ഇസ്റാഈലിലേക്ക് റോക്കറ്റ് ആക്രമണം ഉണ്ടായി, ജെറുസലേമിൽ മുന്നറിയിപ്പ് സൈറണുകൾ മുഴങ്ങി.

നേരത്തെ, ഇറാൻ ഇസ്റാഈലിനെതിരെ നൂറോളം ഡ്രോണുകൾ ഉപയോഗിച്ച് ആക്രമണം ആരംഭിച്ചിരുന്നു. ഇസ്റാഈലിന്റെ ആക്രമണങ്ങൾക്ക് കഠിനവും നിർണായകവുമായ തിരിച്ചടി നൽകുമെന്ന് ഇറാൻ പ്രതിജ്ഞാബദ്ധമായി. ഇതിനിടെ, തുർക്കി പ്രസിഡന്റ് തയ്യിബ് എർദോഗൻ ഇസ്റാഈലിനെതിരെ രൂക്ഷ വിമർശനവുമായി രംഗത്തെത്തി. ഇസ്റാഈൽ മേഖലയെ ദുരന്തത്തിലേക്ക് വലിച്ചിഴയ്ക്കുകയാണെന്നും പ്രധാനമന്ത്രി ബെഞ്ചമിൻ നെതന്യാഹുവിനെ തടയണമെന്നും എർദോഗൻ ആവശ്യപ്പെട്ടു. ഇറാൻ-ഇസ്റാഈൽ സംഘർഷം യുദ്ധസാഹചര്യത്തിലേക്ക് നീങ്ങുന്നതിനിടെ, തുർക്കിയുടെ പ്രതികരണം ഇറാന് പിന്തുണയായി വിലയിരുത്തപ്പെടുന്നു.

വെള്ളിയാഴ്ച പുലർച്ചെ ഇസ്റാഈൽ ഇറാനെതിരെ ശക്തമായ വ്യോമാക്രമണം നടത്തി. ഇറാൻ വിപ്ലവസേനയുടെ തലവനടക്കം ഉന്നത ഉദ്യോഗസ്ഥർ കൊല്ലപ്പെട്ടു. ഇറാൻ തങ്ങളുടെ നിലനിൽപ്പിന് ഭീഷണിയാണെന്ന് നെതന്യാഹു പ്രതികരിച്ചു. അമേരിക്കയുടെ പിന്തുണയോടെയാണ് ആക്രമണമെന്നും കനത്ത തിരിച്ചടി നൽകുമെന്നും ഇറാൻ ഭീഷണി മുഴക്കി. ഇതിന്റെ പശ്ചാത്തലത്തിൽ ഇസ്റാഈൽ നഗരങ്ങളിൽ ഉയർന്ന ജാഗ്രതാ നിർദേശം പുറപ്പെടുവിച്ചു.

സംഘർഷം തുടരുന്നതിനിടെ, ഇറാനിലെ ഇന്ത്യൻ എംബസി ഇന്ത്യൻ പൗരന്മാർക്ക് ജാഗ്രതാ നിർദേശം നൽകി. അനാവശ്യ യാത്രകൾ ഒഴിവാക്കാനും സുരക്ഷാ മുൻകരുതലുകൾ പാലിക്കാനും എംബസി ആവശ്യപ്പെട്ടു. ടെഹ്റാനിലെ എംബസി സോഷ്യൽ മീഡിയ വഴി മുന്നറിയിപ്പുകൾ പുറത്തിറക്കി, പ്രാദേശിക അധികൃതരുടെ സുരക്ഷാ നിർദേശങ്ങൾ പാലിക്കണമെന്നും ഇന്ത്യൻ വംശജർ ജാഗ്രത പുലർത്തണമെന്നും അറിയിച്ചു.

Fresh Israeli attack in Tehran intensifies Iran-Israel tensions; Yemen fires rockets, Jerusalem on alert. Turkey slams Israel’s actions, India issues advisory.