ലോർഡ്‌സ്: ലോക ടെസ്റ്റ് ചാംപ്യൻഷിപ്പ് ഫൈനലിൽ ഓസ്‌ട്രേലിയക്കെതിരെ ദക്ഷിണാഫ്രിക്ക വിജയത്തിന് 69 റൺസ് അകലെ. 282 റൺസിന്റെ വിജയലക്ഷ്യം പിന്തുടരുന്ന ദക്ഷിണാഫ്രിക്ക മൂന്നാം ദിനം അവസാനിക്കുമ്പോൾ 2 വിക്കറ്റ് നഷ്ടത്തിൽ 213 റൺസ് നേടി. സെഞ്ചുറി കുറിച്ച എയ്ഡൻ മാർക്രം (102), തെംബ ബാവൂമ (65) എന്നിവർ ക്രീസിൽ. റ്യാൻ റിക്കിൾട്ടൺ (6), വിയാൻ മൾഡർ (27) എന്നിവരുടെ വിക്കറ്റുകൾ നഷ്ടമായി. മിച്ചൽ സ്റ്റാർക്കാണ് രണ്ട് വിക്കറ്റും വീഴ്ത്തിയത്.

മൂന്നാം ദിനം ഓസ്‌ട്രേലിയയുടെ രണ്ടാം ഇന്നിംഗ്സ് 207 റൺസിന് അവസാനിച്ചു. മിച്ചൽ സ്റ്റാർക്ക് (58*), അലക്സ് ക്യാരി (43) എന്നിവർ മികച്ച പ്രകടനം നടത്തി. ദക്ഷിണാഫ്രിക്കയ്ക്കായി കഗിസോ റബാദ 4, ലുംഗി എൻഗിഡി 3 വിക്കറ്റ് വീഴ്ത്തി. നേരത്തെ, ഓസ്‌ട്രേലിയയുടെ ആദ്യ ഇന്നിംഗ്സ് 212 റൺസിനെതിരെ ദക്ഷിണാഫ്രിക്ക 138 റൺസിന് ഓൾഔട്ടായിരുന്നു. പാറ്റ് കമ്മിൻസ് 6 വിക്കറ്റ് വീഴ്ത്തി.

മൂന്നാം ദിനം 8/144 എന്ന നിലയിൽ ബാറ്റിംഗ് പുനരാരംഭിച്ച ഓസ്‌ട്രേലിയ ആദ്യം നഷ്ടമായത് നതാൻ ലിയോണിന്റെ (2) വിക്കറ്റ്. കഗിസോ റബാദയുടെ പന്തിൽ എൽബിഡബ്ല്യൂ ആയി. പിന്നീട് ഹേസൽവുഡ് (17) സ്റ്റാർക്കിനൊപ്പം 59 റൺസ് കൂട്ടിച്ചേർത്തു. എയ്ഡൻ മാർക്രമിന്റെ പന്തിൽ ഹേസൽവുഡ് പുറത്തായി. ഓസ്‌ട്രേലിയയിൽ മർനസ് ലബുഷെയ്ൻ (22), സ്റ്റീവൻ സ്മിത്ത് (13) എന്നിവർ മാത്രം രണ്ടക്കം കണ്ടു. ഉസ്മാൻ ഖവാജ (6), കാമറൂൺ ഗ്രീൻ (0), ട്രാവിസ് ഹെഡ് (9), ബ്യൂ വെബ്സ്റ്റർ (9), പാറ്റ് കമ്മിൻസ് (6) എന്നിവർ പരാജയപ്പെട്ടു.

ദക്ഷിണാഫ്രിക്കയുടെ ആദ്യ ഇന്നിംഗ്സിൽ ഡേവിഡ് ബെഡിങ്ഹാം (45), തെംബ ബാവൂമ (36) എന്നിവർ പൊരുതി. ബാവൂമയുടെ വിക്കറ്റ് രണ്ടാം ദിനം കമ്മിൻസ് വീഴ്ത്തി. കവർ ഡ്രൈവിന് ശ്രമിച്ച ബാവൂമയെ മാർനസ് ലബുഷെയ്ൻ ഷോർട്ട് കവറിൽ പിടികൂടി. ഓസ്‌ട്രേലിയ ആദ്യ ഇന്നിംഗ്സിൽ 212 റൺസിന് ഓൾഔട്ടായപ്പോൾ കഗിസോ റബാദ 5 വിക്കറ്റ് വീഴ്ത്തി. ബ്യൂ വെബ്സ്റ്റർ (72), സ്റ്റീവൻ സ്മിത്ത് (66) എന്നിവർ ഓസ്‌ട്രേലിയയ്ക്കായി തിളങ്ങി.

South Africa need just 69 runs to beat Australia in the World Test Championship Final. Aiden Markram hits century; Bavuma scores 65*. Mitchell Starc takes two wickets.