കുന്നംകുളം: മാധ്യമ രംഗത്തെ കുന്നംകുളത്തിന്റെ നിറ സാന്നിധ്യമായ സി.സി.ടി.വിയും ഷെയര്‍ ആന്‍ഡ് കെയര്‍ ചാരിറ്റിബിള്‍ സൊസൈറ്റിയും സംയുക്തമായി സംഘടിപ്പിച്ച സ്‌നേഹപൂര്‍വം കൂട്ടുകാര്‍ക്ക്് പദ്ധതിയുടെ ഭാഗമായുള്ള പഠനോപകരണ കിറ്റ് വിതരണം ചെയ്തു.
ബഥനി ഇംഗ്ലീഷ് സ്‌കൂള്‍ ഓഡിറ്റോറിയത്തില്‍ നടന്ന പരിപാടിയില്‍ 300 പേര്‍ക്ക് ബാഗ്,കുട, പുസ്തകം, ടിഫിന്‍ബോക്‌സ് എന്നിവ അടങ്ങുന്ന കിറ്റുകളാണ് വിതരണം ചെയ്തത്്. പരിപാടി മലങ്കര ഓര്‍ത്തഡോക്‌സ് സഭാ സഹായമെത്രാന്‍ ഡോ. ഗീവര്‍ഗീസ് മാര്‍ യൂലിയോസ് മെത്രാപൊലീത്ത ഉദ്ഘാടനം ചെയ്തു. ഷെയര്‍ ആന്റ് കെയര്‍ ചാരിറ്റബിള്‍ സൊസൈറ്റി പ്രസിഡന്റ് ലബീബ് ഹസ്സന്‍ അധ്യക്ഷനായി.
സര്‍ക്കാര്‍ സകൂളുകളില്‍ സാമ്പത്തികമായി പിന്നോക്കാവസ്ഥയിലുള്ള കുട്ടികള്‍ക്ക്് പുതിയ പഠനോപകരണങ്ങള്‍ നല്‍കുകയെന്ന ഉദ്ദേശത്തോടെയാരംഭിച്ച പദ്ധതിക്ക് വന്‍ സ്വീകാര്യതയാണ് ലഭിച്ചത്. കുന്നംകുളത്തെ വിവിധ സ്‌കൂളുകളുമായി സഹകരിച്ച് തങ്ങളുടെ കുട്ടിക്ക്് പഠനോപകരണങ്ങള്‍ വാങ്ങുമ്പോള്‍ മറ്റൊരു കുട്ടിയെ കൂടി ഓര്‍ക്കുക എന്നതായിരുന്നു സ്‌നേഹപൂര്‍വം കൂട്ടുകാര്‍ക്ക് പദ്ധതിയുടെ മുദ്രാവാക്യം. ഇത്തരത്തില്‍ സകൂളുകളില്‍ നിന്നും നേരിട്ടും ലഭിച്ച പഠനോപകരണങ്ങളാണ് കുട്ടികള്‍ക്ക് സമ്മാനിച്ചത്. സി സി ടി വി ചെയര്‍മാന്‍ ടി വി ജോണ്‍സണ്‍, എബി എബ്രഹാം, സൊസൈറ്റി ഭാരവാഹികളായ പെന്‍കോ ബക്കര്‍, സി ഗിരീഷ് കുമാര്‍, എം ബിജുബാല്‍, സൈഫുദ്ധിന്‍ പെന്‍കോ, തോമസ് തെക്കേക്കര, ഷെമീര്‍ ഇഞ്ചിക്കാലയില്‍ തുടങ്ങിയവര്‍ സംമ്പന്ധിച്ചു. കഴിഞ്ഞ ദിവസം പെരുമ്പിലാവില്‍ നടന്ന അപകടത്തില്‍ രക്ഷാ പ്രവര്‍ത്തനത്തിന് നേതൃത്വം നല്‍കിയ ഡോക്ടര്‍ നിസാറിനെ ചടങ്ങില്‍ ആദരിച്ചു.