നീലേശ്വരം: വീടിനരികിലൂടെ കടന്നു പോകുന്ന വൈദ്യുത ലൈന്‍ താഴ്ന്നു കിടക്കുന്നതിനാല്‍ കുടുംബം അപകടഭീഷണിയില്‍. കരിന്തളം ഓമച്ചേരിയിലെ എം ജാനകിയുടെ വീടിനരികിലൂടെയാണ് താഴ്ന്നു കിടക്കുന്ന ലൈന്‍ കടന്നുപോകുന്നത്. ഇവരുടെ മകനും ഭാര്യയും ഒന്നര വയസുള്ള കുഞ്ഞും ഭീതിയോടെയാണു ഇവിടെ കഴിയുന്നത്. മഴക്കാലമായതു കൊണ്ടുതന്നെ ശക്തമായ കാറ്റില്‍ ചെരിഞ്ഞ വൈദ്യുത തൂണ്‍ നിലംപൊത്താനും സാധ്യതയുണ്ട്. വൈദ്യുത കമ്പി ഈനിലയിലായിട്ട് മൂന്നാഴ്ചയിലധികമായെങ്കിലും അധികൃതര്‍ നടപടി സ്വീകരിച്ചിട്ടില്ല.