സ്വന്തം ലേഖകന്‍
കൊല്ലം: ഇരുപത്തിയൊന്നുകാരി ആര്യാ രാജേന്ദ്രന്റെ മേയര്‍ സ്ഥാനലബ്ധിക്കു പിന്നാലെ രാഷ്ട്രീയ കേരളം കൗതുകത്തോടെ വീണ്ടും ഓര്‍ത്തെടുത്ത പേരാണ് കൊല്ലത്തെ സബിദ ബീഗത്തിന്റേത്. രണ്ടായിരാമാണ്ടില്‍ തന്റെ ഇരുപത്തി മൂന്നാം വയസില്‍ കൊല്ലം നഗരത്തിന്റെ മേയറായ സബിദ പിന്നീട് പാര്‍ലമെന്റെറി രാഷ്ട്രീയത്തില്‍ നിന്നു തന്നെ പിന്‍മാറിയെങ്കിലും ഇന്നും പൊതുരംഗത്ത് സജീവമാണ്. 2000 ല്‍ സബിദ അധികാരമേല്‍ക്കുമ്പോള്‍ ഏഷ്യയിലെ ഏറ്റവും പ്രായം കുറഞ്ഞ മേയറെന്ന റെക്കോര്‍ഡിന് ഉടമയായിരുന്നു.
അന്നും ഇന്നും സ്ത്രീകള്‍ ഭരണ നേതൃത്വം ഏറ്റെടുക്കുന്ന ഘട്ടങ്ങളിലെല്ലാം ഉയരാറുള്ള പിന്‍സീറ്റ് ഡ്രൈവിങ് എന്ന ആരോപണത്തിന് യാഥാര്‍ഥ്യവുമായി ഒരു ബന്ധവുമില്ലെന്നാണ് സബിതയുടെ പക്ഷം. ഒരുപാട് ചെറുപ്പക്കാരെ രാഷ്ട്രീയത്തിലേക്ക് ആകൃഷ്ടരാക്കാന്‍ അന്ന് തന്റെ മേയര്‍ സ്ഥാനലബ്ധിക്ക് കഴിഞ്ഞിട്ടുണ്ടെന്ന് സബിത വിശ്വസിക്കുന്നു. താന്‍ മേയറായിരുന്ന കാലത്ത് സ്‌കൂള്‍ വിദ്യാര്‍ഥിയായിരുന്നയാള്‍ ഇരുപത് വര്‍ഷത്തിനു ശേഷം തന്നെ കേന്ദ്ര കഥാപാത്രമാക്കി ഒരു നോവല്‍ രചിച്ചതടക്കം പ്രചോദിപ്പിക്കുന്ന അനുഭവങ്ങള്‍ ഒരുപാടുണ്ട് മുന്‍മേയര്‍ക്ക് ആവേശമായി.
ആഘോഷിക്കപ്പെട്ട മേയര്‍ സ്ഥാനലബ്ധിയുടെ ഇരുപതാണ്ടുകള്‍ക്കിപ്പുറം പാര്‍ലമെന്റെറി രാഷ്ട്രീയത്തോടു തന്നെ വിടപറഞ്ഞ സഖാവ് സബിദ കൊല്ലത്ത് സി.പി.എം ഏരിയാ കമ്മിറ്റിയംഗമെന്ന നിലയില്‍ രാഷ്ട്രീയ പ്രവര്‍ത്തനത്തില്‍ സജീവമാണിന്നും. കൊല്ലത്തെ അഭിഭാഷകനും സി.പി.എം നേതാവുമായ സൗഫീറാണ് ഭര്‍ത്താവ്.