പാരിസ്: ഫ്രഞ്ച് ഓപണ്‍ ടെന്നീസിന്റെ ആദ്യ ദിനത്തില്‍ തന്നെ വന്‍ അട്ടിമറി. വനിതകളിലെ ലോക ഒന്നാം നമ്പര്‍ താരം ജര്‍മനിയുടെ അഞ്ജലീക്ക് കെര്‍ബര്‍ ആദ്യ റൗണ്ടില്‍ തന്നെ തോല്‍വിയോടെ പുറത്തേക്കുള്ള വഴി കണ്ടു. 40ാം റാങ്കിലുള്ള റഷ്യന്‍ താരം ഏക്തറീന മകരോവയാണ് ജര്‍മന്‍ താരത്തെ അട്ടിമറിച്ചത്. 6-2, 6-2 എന്ന സ്‌കോറിന് അനായാസ വിജയമാണ് മകരോവ സ്വന്തമാക്കിയത്. 1968ന് ശേഷം ആദ്യമായാണ് ടോപ് സീഡായ ഒരു താരം ഫ്രഞ്ച് ഓപണിന്റെ ആദ്യ റൗണ്ടില്‍ തന്നെ പുറത്താകുന്നത്.
മറ്റു മത്സരങ്ങളില്‍ ചെക്ക് റിപ്പബ്ലിക്കിന്റെ പെട്ര ക്വിറ്റോവ ആദ്യ പോരാട്ടത്തില്‍ അമേരിക്കന്‍ താരം ജൂലിയ ബൊസെര്‍പിനെ വീഴ്ത്തി.
സ്‌കോര്‍: 6-3, 6-2. ഒളിംപിക്ക് സ്വര്‍ണ മെഡല്‍ ജേത്രി മോണിക പ്യുഗ് ആദ്യ റൗണ്ടില്‍ ഇറ്റാലിയന്‍ താരം റോബര്‍ട്ട വിന്‍സിയെ കീഴടക്കി. സ്‌കോര്‍: 6-3, 3-6, 6-2. റഷ്യയുടെ സ്വെറ്റ്‌ലാന കുസ്‌നട്‌സോവയും ആദ്യ റൗണ്ടില്‍ വിജയിച്ചു. അമേരിക്കയുടെ മക്ഹാലെയെയാണ് റഷ്യന്‍ താരം വീഴ്ത്തിയത്. സ്‌കോര്‍: 7-5, 6-4.
പുരുഷ സിംഗിള്‍സില്‍ ഗ്രിഗറി ദിമിത്രോവ്, ഡൊമിനിക്ക് തീം എന്നിവര്‍ ആദ്യ റൗണ്ടില്‍ വിജയിച്ചു. ദിമിത്രോവ് ഫ്രഞ്ച് താരം സ്റ്റെഫാന്‍ റോബര്‍ട്ടിനെ 6-2, 6-3, 6-4 എന്ന സ്‌കോറിന് വീഴ്ത്തി. ഓസ്ട്രിയന്‍ യുവ താരം ഡൊമിനിക്ക് തീം ആസ്‌ത്രേലിയയുടെ ബെര്‍ണാര്‍ഡ് ടോമിക്കിനെ അനായാസം കീഴടക്കി. സ്‌കോര്‍: 6-4, 6-0, 6-2.
പത്താം കിരീടം ലക്ഷ്യമിടുന്ന സ്പാനിഷ് താരം റാഫേല്‍ നദാല്‍, നിലവിലെ ചാംപ്യന്‍ സെര്‍ബിയയുടെ നൊവാക്ക് ദ്യോക്കോവിച് എന്നിവര്‍ ഇന്ന് ആദ്യ റൗണ്ട് മത്സരത്തിനിറങ്ങും.