കാഞ്ഞങ്ങാട്: ആരോഗ്യ സര്‍വകലാശാല യൂനിയന്‍ നോര്‍ത്ത് സോണ്‍ കലോത്സവം യുഫോറിയ 2016 ലെ കലാമത്സരങ്ങള്‍ പൂര്‍ത്തിയായപ്പോള്‍ പാപ്പിനിശ്ശേരി എം.വി.ആര്‍ നഴ്‌സിങ് കോളജ് ഒന്നാം സ്ഥാനം കരസ്ഥമാക്കി. 123 പോയിന്റ് നേടിയാണ് എം.വി.ആര്‍ കോളജ് ഒന്നാം സ്ഥാനം കരസ്ഥമാക്കിയത്.
113 പോയിന്റ് നേടി പി.എന്‍.പണിക്കര്‍ സ്മാരക ആയുര്‍വേദ നഴ്‌സിങ് കോളജ് (കാസര്‍കോട്) രണ്ടാം സ്ഥാനവും, 93 പോയിന്റുമായി കോഴിക്കോട് ഗവ. നഴ്‌സിങ് കോളജ് മൂന്നാംസ്ഥാനവും കരസ്ഥമാക്കി. കഴിഞ്ഞദിവസം മത്സരങ്ങള്‍ അവസാനിച്ചപ്പോള്‍ എം.വി.ആര്‍ കോളജ് മുന്നിലും തൊട്ടു പിന്നിലായി കോഴിക്കോട് ഗവ.നഴ്‌സിങ് കോളജ്, മൂന്നാം സ്ഥാനത്തായി പി.എന്‍.പണിക്കര്‍ കോളജ് എന്നീ നിലയിലായിരുന്നു. എന്നാല്‍  ഇന്നലെ മത്സരങ്ങള്‍ അവസാനിച്ചതോടെ കോഴിക്കോട് നഴ്‌സിങ് കോളജിനെ പിന്തള്ളി പി.എന്‍.പണിക്കര്‍ സ്മാരക കോളജ് രണ്ടാം സ്ഥാനം കരസ്ഥമാക്കുകയായിരുന്നു. മലപ്പുറം, വയനാട്, കോഴിക്കോട്, കണ്ണൂര്‍, കാസര്‍കോട് ജില്ലകളിലെ 45 കോളജുകളില്‍ നിന്നായി ആയിരത്തോളം കലാപ്രതിഭക ളാണ് പെരിയ ആയമ്പാറ സിമെറ്റ് നഴ്‌സിങ് കോളജില്‍ 71 മത്സര ഇനങ്ങളിലായി കലോത്സവത്തില്‍ മാറ്റുരച്ചത്.