കൊച്ചി: പ്രവര്‍ത്തകര്‍ക്കെതിരേ പൊലിസ് നടത്തിയ ലാത്തിച്ചാര്‍ജിനെ ന്യായീകരിച്ച് രംഗത്തെത്തിയ സി.പി.ഐ സംസ്ഥാന സെക്രട്ടറിക്കെതിരേയും പൊലിസിനെതിരേയും തിരിഞ്ഞ് സി.പി.ഐ നേതാവ് സി.എന്‍. ജയദേവന്‍. ആഭ്യന്തര വകുപ്പിനും മുഖ്യമന്ത്രിക്കും എതിരേ ശക്തമായ പ്രതികരണമാണ് തൃശൂരില്‍ നേരത്തെ പാര്‍ട്ടി സീറ്റ് നിഷേധിച്ച മുന്‍ എം.പി ജയദേവന്റെ പ്രതികരണം.
എല്‍ദോ എബ്രഹാം എം.എല്‍.എയെ പൊലിസ് തിരഞ്ഞുപിടിച്ചു തല്ലിയതാണെന്നാണ് സി.എന്‍ ജയദേവന്‍ തുറന്നടിച്ചത്. ഇത് പാര്‍ട്ടി സെക്രട്ടറിയുടെ നിലപാടിനെ പരസ്യമായി എതിര്‍ക്കുന്നതാണ്. മര്‍ദനത്തിന് നേതൃത്വം നല്‍കിയ ഉദ്യോഗസ്ഥര്‍ക്കെതിരേ നടപടി ഇല്ലെങ്കില്‍ ശക്തമായ പ്രക്ഷോഭം ഉണ്ടാവുമെന്നും അദ്ദേഹം മുന്നറിയിപ്പും നല്‍കിയിട്ടുണ്ട്.

ഭരണത്തില്‍ ഇരിക്കുമ്പോള്‍ തല്ലുകൊള്ളേണ്ട ഗതികേട് സി.പി.ഐക്ക് ഇല്ലെന്നും ജയദേവന്‍ തുറന്നു പറയാനും മടിച്ചില്ല. ഇതെല്ലാം പാര്‍ട്ടി സെക്രട്ടറിക്കെതിരേയും മുഖ്യമന്ത്രിക്കെതിരേയുമുള്ള പരസ്യമായ പ്രതിഷേധവും പ്രതികരണവുമാണ്.

ലാത്തിച്ചാര്‍ജിനെക്കുറിച്ച് നടത്തിയ പ്രതികരണത്തിന് പോസ്റ്ററൊട്ടിച്ചല്ല പ്രതികരിക്കേണ്ടതെന്ന് പ്രതിഷേധക്കാര്‍ക്ക് മറുപടി നല്‍കിയാണ് ഇതിനോട് കാനം രാജേന്ദ്രന്‍ പ്രതികരിച്ചത്.
സി.പി.ഐ പ്രവര്‍ത്തകര്‍ക്കെതിരായ പൊലിസ് ലാത്തി ചാര്‍ജിനെ താന്‍ ന്യായീകരിച്ചിട്ടില്ലെന്നും കാനം വ്യക്തമാക്കി. ജില്ലാ കലക്ടറുടെ റിപ്പോര്‍ട്ട് വന്ന ശേഷം പ്രതികരിക്കാമെന്നാണ് പറഞ്ഞതെന്നും മലക്കം മറിഞ്ഞാണ് കാനം പ്രതികരിച്ചത്.

അതേ സമയം കാനത്തിനെതിരായി പാര്‍ട്ടിക്കാര്‍ പോസ്റ്റര്‍ പതിക്കില്ലെന്ന് മന്ത്രി പി തിലോത്തമന്‍ പറഞ്ഞു. പ്രശ്‌നം സങ്കീര്‍ണമാക്കാന്‍ പാര്‍ട്ടി ശത്രുക്കളാണ് ഇത്തരം കാര്യങ്ങള്‍ ചെയ്യുന്നതെന്നും മന്ത്രി പറഞ്ഞു.