തിരുവനന്തപുരം: വിഖ്യാത ചലച്ചിത്രകാരന്‍ അടൂര്‍ ഗോപാലകൃഷ്ണനെതിരേ സംഘ്പരിവാര്‍ ഉയര്‍ത്തുന്ന ഭീഷണിയെ സാംസ്‌കാരിക കേരളം ഒറ്റമനസോടെ ചെറുക്കണമെന്ന് മന്ത്രി എ.കെ ബാലന്‍.
ഭരണഘടന ഉറപ്പുനല്‍കുന്ന അവകാശങ്ങളോടെ എല്ലാ ജനങ്ങള്‍ക്കും സുരക്ഷിതമായി ജീവിക്കാന്‍ അവസരമുണ്ടാകണമെന്ന് പറഞ്ഞതിനാണ് സംഘ്പരിവാര്‍ ഭീഷണി ഉയര്‍ത്തുന്നത്. ഭരണവര്‍ഗ പിന്തുണയോടെ സംഘ്പരിവാര്‍ നടത്തുന്ന ആള്‍ക്കൂട്ട അക്രമങ്ങള്‍ക്കും കൊലപാതകങ്ങള്‍ക്കുമെതിരേ ഐക്യരാഷ്ട്രസഭയില്‍ പോലും പ്രതിഷേധമുയര്‍ന്നു.
തങ്ങള്‍ക്കെതിരേ സംസാരിക്കുന്നവരെ പാകിസ്താനിലേക്ക് അയക്കുമെന്നാണ് സംഘ്പരിവാര്‍ ഇതുവരെ പറഞ്ഞിരുന്നത്. ഇപ്പോള്‍ ചന്ദ്രനിലേക്ക് അയക്കുമെന്നാണ് പറയുന്നത്. മനുഷ്യര്‍ക്കും മനുഷ്യാവകാശങ്ങള്‍ക്കുംവേണ്ടി വാദിക്കുന്നവരെയൊക്കെ ഇവര്‍ ശത്രുക്കളായി കാണുന്നു.
ഭീഷണിക്ക് കീഴടങ്ങി നിശ്ശബ്ദമായി ജീവിക്കില്ലെന്ന ഉറച്ച നിലപാട് അടൂര്‍ സ്വീകരിച്ചിരിക്കുകയാണ്. അദ്ദേഹത്തിനൊപ്പമാണ് കേരളത്തിന്റെ മനസ്. നിരവധി പുസ്തകങ്ങള്‍ രചിച്ചിട്ടുള്ള ആളാണ് ബി.ജെ.പി സംസ്ഥാന അധ്യക്ഷന്‍. അടൂരിനെ സംഘ്പരിവാര്‍ നേതാവ് ഭീഷണിപ്പെടുത്തിയതിനെക്കുറിച്ച് അദ്ദേഹത്തിന്റെ പ്രതികരണമറിയാന്‍ താല്‍പര്യമുണ്ട്. വ്യത്യസ്ത അഭിപ്രായമുള്ളവരെ തകര്‍ത്തുകളയുമെന്ന സംഘ്പരിവാറിന്റെ നിലപാട് കേരളത്തില്‍ വിലപ്പോകില്ലെന്നും മന്ത്രി പ്രസ്താവനയില്‍ അറിയിച്ചു.