കോഴിക്കോട്: സയ്യിദ് മുഹമ്മദലി ശിഹാബ് തങ്ങളുടെ പത്താം ചരമ വാര്‍ഷികത്തോടനുബന്ധിച്ച് 'തങ്ങളില്ലാത്ത പത്തുവര്‍ഷം' എന്ന വിഷയത്തില്‍ ഓഗസ്റ്റ് രണ്ടാംവാരം വയനാട് കല്‍പ്പറ്റയില്‍ അനുസ്മരണ സമ്മേളനം നടത്താന്‍ മുസ്‌ലിംലീഗ് സംസ്ഥാന ഭാരവാഹിയോഗം തീരുമാനിച്ചു.
രാഹുല്‍ ഗാന്ധി സമ്മേളനത്തില്‍ പങ്കെടുക്കും. ശിഹാബ് തങ്ങളുടെ ചരമദിനമായ ഓഗസ്റ്റ് ഒന്നിന് വിവിധ ജില്ലാ കമ്മിറ്റികളുടെ നേതൃത്വത്തിലും അനുസ്മരണ സമ്മേളനങ്ങള്‍ സംഘടിപ്പിക്കുന്നുണ്ട്.
കേന്ദ്രം ഭരിക്കുന്ന ബി.ജെ.പി ദേശീയതലത്തിലും സംസ്ഥാനത്തും സാംസ്‌കാരിക ഫാസിസവും ഭീകരതയും അടിച്ചേല്‍പ്പിക്കുകയാണെന്ന് യോഗം അഭിപ്രായപ്പെട്ടു. മുത്വലാഖ്, യു.എ.പി.എ, വിവരാവകാശം എന്നിവയില്‍ നിയമനിര്‍മാണം നടത്തിയും അടൂര്‍ ഗോപാലകൃഷ്ണനെ പോലുള്ളവരെ തേജോവധം ചെയ്തും ഫാസിസ്റ്റ് ശക്തികള്‍ മുന്നോട്ടുപോവുകയാണ്. വിശ്വാസത്തിനും വ്യക്തി സ്വാതന്ത്ര്യത്തിനും നേരെയുള്ള ഇത്തരം കടന്നാക്രമണങ്ങളെ യോഗം അപലപിച്ചു.
മുസ്‌ലിംലീഗ് സംസ്ഥാന കമ്മിറ്റി ഫണ്ട് പ്രവര്‍ത്തനങ്ങള്‍ വിജയിപ്പിക്കാനും യോഗം ആഹ്വാനം ചെയ്തു. ജില്ലാ പ്രവര്‍ത്തക സമിതി യോഗങ്ങള്‍ ഓഗസ്റ്റ് മൂന്നിന് എറണാകുളം, ഓഗസ്റ്റ് 6ന് കണ്ണൂര്‍, ഓഗസ്റ്റ് 7ന് തിരുവനന്തപുരം, കൊല്ലം, കോട്ടയം, തൃശ്ശൂര്‍, പാലക്കാട്, കോഴിക്കോട്, ഓഗസ്റ്റ് എട്ടിന് വയനാട്, കാസര്‍കോട്, ഇടുക്കി, ആലപ്പുഴ, പത്തനംതിട്ട എന്നിങ്ങനെ നടത്താനും തീരുമാനിച്ചു. വാര്‍ഡ് പ്രസിഡന്റ്, ജനറല്‍ സെക്രട്ടറിമാരെ പങ്കെടുപ്പിച്ചുള്ള നിയോജക മണ്ഡലം പ്രവര്‍ത്തക കണ്‍വന്‍ഷന്‍ ഓഗസ്റ്റ് 14,15 തിയതികളിലും സംഘടിപ്പിക്കും.
സീതി സാഹിബ് പഠന ഗവേഷണ കേന്ദ്രത്തിന്റെ ഉദ്ഘാടനം ഓഗസ്റ്റ് 21ന് കോഴിക്കോട് ടാഗോര്‍ സെന്ററിനറി ഹാളില്‍ സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും.
ലീഗ് ഹൗസില്‍ ചേര്‍ന്ന സംസ്ഥാന ഭാരവാഹികളുടെ യോഗത്തില്‍ ജനറല്‍ സെക്രട്ടറി കെ.പി.എ മജീദ് അധ്യക്ഷത വഹിച്ചു. സി.ടി അഹമ്മദലി, എം.സി മായിന്‍ഹാജി, വി.കെ അബ്ദുല്‍ ഖാദര്‍ മൗലവി, സി.മോയിന്‍കുട്ടി, കെ.കുട്ടി അഹമ്മദ്കുട്ടി, ടി.പി.എം സാഹിര്‍, സി.എ.എം.എ കരീം, അഡ്വ.പി.എം.എ സലാം, അബ്ദുറഹിമാന്‍ കല്ലായി, കെ.എസ് ഹംസ, കെ.കെ ആബിദ് ഹുസൈന്‍ തങ്ങള്‍ എം.എല്‍.എ, അഡ്വ.എന്‍. ഷംസുദ്ധീന്‍ എം.എല്‍.എ, അബ്ദുറഹിമാന്‍ രണ്ടത്താണി, സി.എച്ച് റഷീദ്, ബീമാപ്പള്ളി റഷീദ്, സി.പി ചെറിയ മുഹമ്മദ് ചര്‍ച്ചയില്‍ പങ്കെടുത്തു.