തിരുവനന്തപുരം: സാലറി ചലഞ്ചില്‍ ഒരുമാസത്തെ ശമ്പളം നല്‍കിയ ജീവനക്കാരുടെ സര്‍വീസ് ബുക്കില്‍ ഇക്കാര്യം രേഖപ്പെടുത്തിയേക്കുമെന്ന് റിപ്പോര്‍ട്ട്. ഇക്കാര്യം സര്‍ക്കാര്‍ പരിഗണിക്കുന്നതായാണ് റിപ്പോര്‍ട്ട്. ഇക്കാര്യം ആവശ്യപ്പെട്ട് സി.പി.എം അനുകൂല സംഘടനയായ കേരള സെക്രട്ടേറിയറ്റ് എംപ്ലോയീസ് അസോസിയേഷന്‍ സര്‍ക്കാരിന് നിവേദനം നല്‍കിയന്നെും ഇത് അനുകൂല ശുപാര്‍ശയോടെ ധനമന്ത്രി തോമസ് ഐസക്കിന്റെ പക്കലെത്തിയെന്നും റിപ്പോര്‍ട്ടില്‍ പറയുന്നു. എന്നാല്‍ സര്‍ക്കാര്‍ അന്തിമ തീരുമാനമെടുത്തിട്ടില്ല.

സാലറി ചലഞ്ചിനെ അംഗീകാത്തവര്‍ക്കെതിരായ നീക്കമാണിതെന്നാണ് വിലയിരുത്തല്‍. സാലറി ചലഞ്ച് നിര്‍ബന്ധിത പിരിവല്ലെന്ന് ഹൈക്കോടതി പരാമര്‍ശം നിലനില്‍ക്കെയാണ് സര്‍ക്കാര്‍ പുതിയ നീക്കം നടത്തുന്നത്.

സ്ഥാനക്കയറ്റം, ഇന്‍ക്രിമെന്റ് തുടങ്ങിയ സര്‍വീസ് സംബന്ധമായ കാര്യങ്ങളാണ് സര്‍വീസ് ബുക്കില്‍ ഉള്‍ക്കൊള്ളിക്കുന്നത്. ഗുഡ്‌സര്‍വീസ് എന്‍ട്രി പോലെ മികച്ച സേവനത്തെ പ്രകീര്‍ത്തിക്കുന്ന നടപടികളും അച്ചടക്കനടപടിയുടെ ഭാഗമായുള്ള ശിക്ഷാവിവരങ്ങളും ഇതില്‍ ഉള്‍പ്പെടുത്തും.

പണംനല്‍കുന്നവരും അല്ലാത്തവരും തമ്മിലുള്ള വിവേചനത്തിന് ഇത് കാരണമാകുമെന്ന് ജീവനക്കാര്‍ ആശങ്കപ്പെടുന്നു. സി.പി.എം. സംഘടനതന്നെ ഇതില്‍ രംഗത്തുവന്നത് സര്‍ക്കാരിന്റെ ഒത്താശയോടെയാണെന്നും വിമര്‍ശനമുയരുന്നുണ്ട്.

ബഹുഭൂരിപക്ഷം ഉദ്യോഗസ്ഥരും സലറി ചലഞ്ച് അംഗീകരിച്ചിരുന്നില്ല്. എയ്ഡഡ് കോളേജ്, സ്‌കൂള്‍ മേഖലയില്‍ 80 ശതമാനത്തോളം അധ്യാപകരും സാലറി ചലഞ്ചിനോട് 'നോ' പറയുകയാണ് ചെയ്തത്. സി.പി.എം. അനുകൂല സംഘടനയ്ക്കാണ് എയ്ഡഡ് കോളേജ് അധ്യാപകരില്‍ ഏറെ സ്വാധീനമെങ്കിലും അവര്‍ സാലറി ചലഞ്ചിനോട് മുഖംതിരിക്കുകയായിരുന്നു.