ബാലുശ്ശേരി: നന്മണ്ടയില്‍ അപകടങ്ങള്‍ നിത്യസംഭവമായി മാറുന്നത് ജനത്തെ ഭീതിയിലാഴ്ത്തുന്നു. ഇന്നലെ വൈകിട്ട് പിക്കപ്പ് വാന്‍ സ്‌കൂട്ടറിലിടിച്ച് യാത്രക്കാരിക്ക് പരുക്കേറ്റു. നന്മണ്ട വലിയപറമ്പില്‍ ദിവ്യക്കാണ് പരുക്കേറ്റത്.
ബാലുശ്ശേരി റോഡില്‍ കുമാരം പൊയില്‍ ക്ഷീരോല്‍പാദക സംഘത്തിനു മുന്നിലാണു സംഭവം. സംഘത്തിലേക്ക് പാല്‍ കൊണ്ടുവരുമ്പോള്‍ ഇവര്‍ സഞ്ചരിച്ച സ്‌കൂട്ടറില്‍ കോഴിക്കോട് ഭാഗത്തുനിന്ന് വരികയായിരുന്ന പിക്കപ്പ് വാന്‍ ഇടിക്കുകയായിരുന്നു. സ്‌കൂട്ടറില്‍നിന്ന് തെറിച്ചു വീണ ദിവ്യയെ നാട്ടുകാര്‍ സ്വകാര്യ ആശുപത്രിയില്‍ പ്രവേശിപ്പിച്ചു.
ഏതാനും ദിവസം മുന്‍പ് ഇതേ സ്ഥലത്തു രണ്ട് അപകടങ്ങളുണ്ടായി. ബൈക്കും കാറും കൂട്ടിയിടിച്ച അപകടത്തില്‍ ബൈക്ക് യാത്രക്കാരനു സാരമായി പരുക്കേറ്റിരുന്നു.
ഇതിന് ഒരു മണിക്കൂര്‍ മുന്‍പ് ലോറിയും ബൈക്കും കൂട്ടിയിടിച്ച് പേരാമ്പ്ര സ്വദേശിയായ യുവാവിനു പരുക്കേറ്റു. ചെറിയ ചാറ്റല്‍ മഴയില്‍ പോലും മഴവെള്ളം കെട്ടിക്കിടക്കുന്ന വളവിലാണു സ്ഥിരമായി അപകടം സംഭവിക്കുന്നത്.