പന്തീരാങ്കാവ്: ഒളവണ്ണ ഗ്രാമ പഞ്ചായത്ത് ആറാം വാര്‍ഡില്‍ പള്ളിപ്പുറം റോഡില്‍ ചെറയക്കാട്ട് രത്‌നാകരന്റെ കൃഷിയിടത്തില്‍ സാമൂഹ്യദ്രോഹികളുടെ അഴിഞ്ഞാട്ടം. തോട്ടത്തിലെ അമ്പതോളം വാഴകള്‍ കഴിഞ്ഞ ദിവസം വെട്ടി നശിപ്പിച്ചു. കുലച്ച വാഴകളാണ് നശിപ്പിച്ചത്. സമീപത്തുള്ള ഇലക്ട്രിക്ക് പോസ്റ്റിലെ റ്റിയൂബ് ലൈറ്റ് എറിഞ്ഞ് ഉടക്കുകയും തോട്ടത്തിലെ ഒരു കവുങ്ങ് മുറിക്കാനുള്ള ശ്രമവും നടത്തിയിട്ടുണ്ട്. 50000 രൂപയുടെ നാശനഷ്ടം ഉണ്ടായതായി കര്‍ഷകന്‍ പറയുന്നു. സമീപത്ത് രാത്രികാലങ്ങളില്‍ മദ്യപരുടെ അഴിഞ്ഞാട്ടം പതിവാണെന്ന് നാട്ടുകാര്‍ പറയുന്നു. നല്ലളം പോലിസിലും ഒളവണ്ണ കൃഷി ഓഫിസര്‍ക്കും ഇത് സംബന്ധിച്ച് പരാതി നല്‍കിയിട്ടുണ്ട്. വാര്‍ഡ് അംഗം കെ. ഷീന സ്ഥലം സന്ദര്‍ശിച്ചു. പളളിപ്പുറം റോഡിലെ മദ്യപാനവും മദ്യപരുടെ അഴിഞ്ഞാട്ടവും അമര്‍ച്ച ചെയ്യാനുള്ള നടപടികള്‍ ഉണ്ടാകണമെന്ന് നാട്ടുകാര്‍ ആവശ്യപ്പെട്ടു.