മ്യൂണിക്: കഴിഞ്ഞ വര്‍ഷം യുവന്റസിന് വിട്ടുനല്‍കിയ ക്രിസ്റ്റ്യാനോ റൊണാള്‍ഡോയെ തിരിച്ചുവിളിക്കേണ്ട അവസ്ഥയിലായി റയല്‍ മാഡ്രിഡ്. തുടര്‍ തോല്‍വികള്‍ വിനയായ റയലിനെ ഇന്നലെ ടോട്ടന്‍ഹാമും മുട്ടുകുത്തിച്ചു.
പ്രീ സീസണില്‍ ഓഡി കപ്പില്‍ ടോട്ടന്‍ഹാമിനെ നേരിട്ട റയല്‍ എതിരില്ലാത്ത ഒരു ഗോളിനാണ് പരാജയപ്പെട്ടത്. അത്‌ലറ്റിക്കോയോട് നാണംകെട്ട തോല്‍വി വഴങ്ങിയ ശേഷമുള്ള മത്സരത്തിലും തോല്‍വി വഴങ്ങിയത് സിദാനും സംഘത്തിനും കനത്ത തിരിച്ചടിയായി.
ടോട്ടന്‍ഹാം സൂപ്പര്‍ താരം ഹാരി കെയ്ന്‍ ആദ്യ പകുതിയില്‍ നേടിയ ഗോളാണ് മത്സരഫലം നിശ്ചയിച്ചത്. റയല്‍ പ്രതിരോധത്തിലെ പിഴവുകള്‍ ഇന്നലെയും തുടര്‍ക്കഥയായപ്പോള്‍ അതിലൊരു പിഴവില്‍ നിന്നാണ് ഹാരി കെയ്ന്‍ ഗോള്‍ കണ്ടെത്തിയത്. ഈഡന്‍ ഹസാര്‍ഡിന്റെ ആദ്യ റയല്‍ ഗോള്‍ കാത്തിരുന്ന ആരാധകര്‍ക്ക് ഇന്നലെയും നിരാശരാവേണ്ടി വന്നു. ഈ പ്രീസീസണില്‍ മൂന്നാം തവണയാണ് റയല്‍ തോല്‍ക്കുന്നത്. ആഴ്‌സനലിനോട് പെനല്‍റ്റിയില്‍ ജയിച്ചത് മാത്രമാണ് ഏകആശ്വാസം.