കൊടുവള്ളി: ഓമശേരി ശാദി ഗോള്‍ഡില്‍ തോക്ക് ചൂണ്ടി കവര്‍ച്ച നടത്തിയ സംഭവത്തില്‍ ഒരാള്‍ കൂടി പ്രതിയില്‍. വെസ്റ്റ് ബംഗാള്‍ മൊണ്ടാല്‍ അബ്ജാന്‍ നഗര്‍ സ്വദേശി ആലംഗീറഹ്മാനെ (22) യാണ് കൊടുവള്ളി പൊലിസ് വെസ്റ്റ് ബംഗാളില്‍ നിന്ന് പിടികൂടിയത്. കവര്‍ച്ചാ ശ്രമത്തിനിടെ ജ്വല്ലറി ജീവനക്കാര്‍ സാഹസികമായി പിടികൂടി പൊലിസിന് കൈമാറിയ ബഗ്ലാദേശ് സ്വദേശി നയിം അലി ഖാന്‍ നല്‍കിയ വിവരത്തിന്റെ അടിസ്ഥാനത്തില്‍ പ്രതികള്‍ ഉപയോഗിച്ച ഫോണ്‍ കേന്ദ്രീകരിച്ച് നടത്തിയ അന്വേഷണത്തെ തുടര്‍ന്നാണ് കൊടുവള്ളി എസ്.ഐ കെ. പ്രജീഷിന്റെ നേതൃത്വത്തില്‍ അന്വേഷണ സംഘം ബംഗാളിലെത്തി രണ്ടാം പ്രതിയെ സാഹസികമായി പിടികൂടിയത്.
സംഭവത്തിലെ മറ്റൊരു പ്രതി അസാറുല്‍ മൊണ്ടാല്‍ ബംഗ്ലാദേശിലേക്ക് കടന്നതായി സൂചന ലഭിച്ചതിനാല്‍ ഇന്റര്‍പോളിന്റെ സഹായം തേടിയതായും പ്രതി തിരികെ വരുന്ന പക്ഷം വിവരം നല്‍കാന്‍ ബ്യൂറോ ഓഫ് എമിഗ്രേഷന്‍ അധികൃതര്‍ക്ക് അപേക്ഷ നല്‍കിയതായും ജില്ലാ പൊലിസ് മേധാവി കെ.ജി സൈമണും താമരശ്ശേരി ഡിവൈ.എസ്.പി എന്‍.വി അബ്ദുല്‍ ഖാദറും കൊടുവള്ളിയില്‍ നടത്തിയ വാര്‍ത്താ സമ്മേളനത്തില്‍ അറിയിച്ചു. കഴിഞ്ഞ ജൂലൈ 13ാം തിയതി വൈകിട്ട് ഏഴരയോടെയായിരുന്നു കേസിനാസ്പദമായ സംഭവം.