കോഴിക്കോട്: സ്ത്രീകള്‍ക്ക് പള്ളിയില്‍ പ്രവേശിക്കാന്‍ താല്‍പര്യമില്ലെങ്കില്‍ എന്തു ചെയ്യുമെന്നും കേട്ടറിവുകളുടെ അടിസ്ഥാനത്തില്‍ ഹരജിയുമായി വരരുതെന്നും ഹൈക്കോടതി.
മുസ്‌ലിം സ്ത്രീകള്‍ക്ക് പള്ളികളില്‍ കയറി പ്രാര്‍ത്ഥന നടത്താന്‍ അവകാശം നല്‍കി ഉത്തരവിടണമെന്നാവശ്യപ്പെട്ട് അഖില ഭാരത ഹിന്ദു മഹാസഭ കേരള ഘടകം പ്രസിഡന്റ് സ്വാമി ദത്താത്രേയ സായ് സ്വരൂപ് നാഥ് നല്‍കിയ ഹരജി തള്ളിക്കൊണ്ടാണ് ഹൈക്കോടതി ഹരജിക്കാരനോട് ഈ കാര്യങ്ങള്‍ പറഞ്ഞത്.

മുസ്‌ലിം സ്ത്രീകള്‍ക്ക് പള്ളിയില്‍ കയറി പ്രാര്‍ഥന നടത്താന്‍ അനുവദിക്കാത്ത നടപടി ഭരണഘടനാ വിരുദ്ധമാണെന്ന ഹരജിക്കാരെന്റ ആരോപണമാണ് കോടതി തള്ളിയത്. ചീഫ് ജസ്റ്റീസ് അധ്യക്ഷനായ ഡിവിഷന്‍ ബെഞ്ചാണ് ഹരജി തള്ളിയത്.

പള്ളികളില്‍ കയറുന്ന കാര്യത്തില്‍ മുസ്‌ലീം സ്ത്രീകള്‍ വിവേചനം അനുഭവിക്കുന്നുണ്ടെന്ന് വ്യക്തമാക്കുന്ന തെളിവുകള്‍ ഹാജരാക്കാന്‍ ഹരജിക്കാരന് കഴിഞ്ഞിട്ടില്ലന്നും ഇങ്ങനെയൊരു കേസ് നടത്താന്‍ ഹരജിക്കാരന് എന്ത് അവകാശമാണുള്ളതെന്നും കോടതി വാക്കാല്‍ ചോദിച്ചു.

എന്നാല്‍ എല്ലാ വിഭാഗക്കാര്‍ക്കും വേണ്ടി ഇടപെടാന്‍ തനിക്ക് കഴിയുമെന്നും മുസ്‌ലിം സ്ത്രീകള്‍ വിവേചനം അനുഭവിക്കുന്നുണ്ടെന്നും ഹരജിക്കാരന്‍ മറുപടി നല്‍കിയെങ്കിലും മുസ്‌ലിം സ്ത്രീകള്‍ മക്കയില്‍ പോവുന്നുണ്ടെന്ന് കോടതി ചൂണ്ടിക്കാട്ടി.