വൈത്തിരി: ലോക പുകയില വിരുദ്ധ ദിനത്തിന്റെ ഭാഗമായി വൈത്തിരിയില്‍ ജില്ലാതല റാലിയും സെമിനാറും നടത്തി. ജില്ലാതല ഉദ്ഘാടനം ജില്ലാ പഞ്ചായത്ത് വൈസ് പ്രസിഡന്റ് പി.കെ അസ്മത്ത് നിര്‍വഹിച്ചു. താലൂക്ക് ആശുപത്രി പരിസരത്തു നിന്നും ആരംഭിച്ച റാലി സര്‍ക്കിള്‍ ഇന്‍സ്‌പെക്ടര്‍ അബ്ദുള്‍ ഷെറീഫ് ഫ്‌ളാഗ് ഓഫ് ചെയ്തു. വൈത്തിരി സര്‍വ്വീസ് സഹകരണ ബാങ്ക് ഓഡിറ്റോറിയത്തില്‍ നടന്ന ചടങ്ങില്‍ ജില്ലാ പഞ്ചായത്ത് ആരോഗ്യ വിദ്യഭ്യാസ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ എ ദേവകി അധ്യക്ഷയായി.
ഗ്രാമ പഞ്ചായത്ത് വൈസ് പ്രസിഡന്റ് യു.സി ഗോപി മുഖ്യപ്രഭാഷണം നടത്തി. ആരോഗ്യ കേരളം ജില്ലാ പ്രോഗ്രാം മാനേജര്‍ ഡോ. അഭിലാഷ് ദിനാചരണ സന്ദേശം നല്‍കി. ഡെപ്യൂട്ടി ഡി.എം.ഒ ഡോ. കെ സന്തോഷ്, സിവില്‍ എക്‌സൈസ് ഓഫിസര്‍ ജോഷി തുമ്പാനം എന്നിവര്‍ വിവിധ വിഷയങ്ങളില്‍ ക്ലാസെടുത്തു. ആരോഗ്യ കേരളം വയനാട് പരിശീലിപ്പിച്ച കുട്ടി ഡോക്ടര്‍മാര്‍, സ്റ്റുഡന്റ് പൊലിസ് കേഡറ്റുമാര്‍, എന്‍.സി.സി, പൂക്കോട് വെറ്ററിനറി കോളജ് വിദ്യാര്‍ഥികള്‍, നന്മ പ്രവര്‍ത്തകര്‍, വ്യാപാരികള്‍, ആശാ-അംഗനവാടി പ്രവര്‍ത്തകര്‍, ആരോഗ്യ പ്രവര്‍ത്തകര്‍ എന്നിവര്‍ റാലിയില്‍ പങ്കെടുത്തു. വൈത്തിരി ഗ്രാമപഞ്ചായത്ത് ആരോഗ്യ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ ഡോളി, മാസ് മീഡിയ ഓഫിസര്‍മാരായ കെ.പി സാദിഖ് അലി, ബേബി നാപ്പള്ളി, ഹംസ ഇസ്മാലി, ഡോ. കെ.എസ് അജയന്‍, ടെക്‌നിക്കല്‍ അസിസ്റ്റന്റ് സി.സി ബാലന്‍, ഡോ. ദിവ്യ, ഡോ. ഹംസ പലേക്കാടന്‍, കെ.സി രാജേന്ദ്രന്‍, കെ ശ്രീജിത് സംസാരിച്ചു.