കൊച്ചി: മദ്യപിച്ച് വാഹനമോടിച്ച് മധ്യമപ്രവര്‍ത്തകന്‍ കെ.എം ബഷീറിനെ കൊലപ്പെടുത്തിയ ശ്രീറാം വെങ്കിട്ടരാമന് ജാമ്യം നല്‍കിയത് റദ്ദാക്കണമെന്നാവശ്യപ്പെട്ട് സര്‍ക്കാര്‍ ഹൈക്കോടതിയെ സമീപിച്ചു. എന്നാല്‍ ജാമ്യം അടിയന്തരമായി റദ്ദു ചെയ്യാന്‍ ഹൈക്കോടതി വിസമ്മതിച്ചു. അതേസമയം, പൊലിസിന് രൂക്ഷ വിമര്‍ശനം ചൊരിഞ്ഞ ഹൈക്കോടതി, തെളിവു ശേഖരിക്കുന്നതില്‍ പൊലിസ് വീഴ്ച വരുത്തിയെന്ന് കുറ്റപ്പെടുത്തി.

അപകടം ഉണ്ടായാല്‍ ഇങ്ങനെയാണോ തെളിവ് ശേഖരിക്കേണ്ടതെന്ന് കോടതി ചോദിച്ചു. തെളിവ് അയാള്‍ കൊണ്ടുവരുമെന്ന് കരുതിയോ എന്നും പൊലിസിനോട് കോടതി ചോദിച്ചു. ശ്രീ റാം വെങ്കിട്ടരാമന് ഹൈക്കോടതി നോട്ടീസ് നല്‍കിയിട്ടുണ്ട്. ഹരജി വെള്ളിയാഴ്ച വീണ്ടും പരിഗണിക്കും.

കേസില്‍ അന്വേഷണം പ്രാഥമിക ഘട്ടത്തില്‍ മാത്രം ആണെന്നിരിക്കെ ഇപ്പോള്‍ ജാമ്യം നല്‍കുന്നത് തെളിവ് നശിപ്പിക്കാന്‍ ഇടയാക്കുമെന്നായിരുന്നു സര്‍ക്കാര്‍ വാദം. ഇത് കേസ് അന്വേഷണത്തെ ദോഷകരമായി ബാധിക്കുമെന്നും സര്‍ക്കാര്‍ ഹൈക്കോടതിയില്‍ പറഞ്ഞു.

ശ്രീറാം പൊലിസിനെ പറ്റിച്ചു- സര്‍ക്കാര്‍

ശ്രീറാം വെങ്കിട്ടരാമന്‍ പൊലിസിനെ പറ്റിച്ചുവെന്ന് സര്‍ക്കാര്‍ കോടതിയില്‍ പറഞ്ഞു. മദ്യപരിശോധന ഒഴിവാക്കാന്‍ ബോധപൂര്‍വ്വം ഇടപെടല്‍ നടത്തി. മെഡിക്കല്‍ കോളജ് ആശുപത്രിയിലേക്ക് പോകണം എന്ന് ആവശ്യപ്പെട്ടിട്ടും പൊലിസ് അറിയാതെ കിംസ് ആശുപത്രിയില്‍ പോയി ചികിത്സതേടി. അതുകൊണ്ടു തന്നെ രക്ത പരിശോധന രാവിലെ മാത്രമേ നടത്താനായുള്ളു എന്നും വാദിച്ചു.