കല്ലമ്പലം: ആറ്റിങ്ങല്‍ വലിയകുന്ന് താലൂക്കാശുപത്രിയില്‍ ഗര്‍ഭപാത്രം നീക്കം ചെയ്യാനുള്ള ശസ്ത്രക്രിയയും ആരംഭിച്ചു.
ഇതിനോടകം നാല് ശസ്ത്രക്രിയകള്‍ വിജയകരമായി പൂര്‍ത്തിയാക്കിയതായി ആശുപത്രി അധികൃതര്‍ അറിയിച്ചു. സ്വകാര്യ ആശുപത്രികളില്‍ ഒരുലക്ഷത്തോളം രൂപ ചെലവ് വരുന്ന ശാസ്ത്രക്രിയായാണ് തികച്ചും സൗജന്യമായി ഈ സര്‍ക്കാര്‍ ആശുപത്രിയില്‍ നടത്തുന്നത്. പാവപ്പെട്ടരോഗികള്‍ക്ക് ഇത് വലിയ അനുഗ്രഹമായിട്ടുണ്ട്. ആശുപത്രിയിലെ ഗൈനക്കോളജിസ്റ്റുമാരായ ഡോ. ഗീത, ഡോ. ദേവി, അനസ്‌തേഷ്യഡോക്ടര്‍ ഷാരോണ്‍, സ്റ്റാഫ് നഴ്‌സ്മാരായ ബിന്ദുറാണി, സബിത, സിന്ധു, ടെക്‌നീഷ്യന്‍ ദീപുമോന്‍ എന്നിവരടങ്ങുന്ന സംഘമാണ് ശസ്ത്രക്രിയകള്‍ക്ക് മേല്‍നോട്ടം വഹിക്കുന്നത്.
ഗര്‍ഭപാത്ര സംബന്ധമായ അസുഖങ്ങളുമായി ബന്ധപ്പെട്ട് ധാരാളം വീട്ടമ്മമാര്‍ ആശുപത്രിയില്‍ ചികിത്സ തേടിയെത്തുന്നുണ്ടെന്നും ആശുപത്രി അധികൃതര്‍ പറഞ്ഞു.