തിരുവനന്തപുരം: ഇന്റര്‍ ക്ലബ് അത്‌ലറ്റിക് മീറ്റിന്റെ ആദ്യ ദിനത്തില്‍ കോതമംഗലം മാര്‍ അത്തനേഷ്യസിന്റെ കുതിപ്പ്. തിരുവനന്തപുരം സായിയുടെ ആധിപത്യം തകര്‍ത്താണ് മാര്‍ അത്തനേഷ്യസ് മുന്നിലെത്തിയത്. മൂന്നു സ്വര്‍ണവും മൂന്നു വെള്ളിയും അഞ്ചു വെങ്കലവും ഉള്‍പ്പെടെ 66 പോയിന്റാണ് കോതമംഗലം നേടിയത്. ആറു സ്വര്‍ണവും രണ്ട് വെള്ളിയും ഉള്‍പ്പെടെ 60 പോയിന്റോടെ തിരുവനന്തപുരം സായി രണ്ടാം സ്ഥാനത്തുണ്ട്. മൂന്നാം സ്ഥാനത്തുള്ള മലബാര്‍ സ്‌പോര്‍ട്‌സ് അക്കാദമി രണ്ട് സ്വര്‍ണവും മൂന്ന് വെള്ളിയും ഒരു വെങ്കലവും ഉള്‍പ്പെടെ 49 പോയിന്റ് സ്വന്തമാക്കി.
18 വയസില്‍ താഴെയുള്ള പെണ്‍കുട്ടികളുടെ ഹാമര്‍ ത്രോയില്‍ 51.25 മീറ്റര്‍ ദൂരം കീഴടക്കിയ ബ്ലെസി ദേവസ്യ (എം.എ സ്‌പോര്‍ട്‌സ് അക്കാദമി, കോതമംഗലം), പെണ്‍കുട്ടികളുടെ ഹൈജംപില്‍ 1.73 മീറ്റര്‍ ഉയരം താണ്ടിയ എം. ജിഷ്ണ (പാലക്കാട്, കുമരംപുത്തൂര്‍, കല്ലടി ജി.എച്ച്.എസ്), പോള്‍വോള്‍ട്ടില്‍ 4.51 മീറ്റര്‍ ഉയരം കീഴടക്കിയ എ.കെ സിദ്ധാര്‍ഥ് (എം.എ സ്‌പോര്‍ട്‌സ് അക്കാദമി, കോതമംഗലം) എന്നിവര്‍ പുതിയ റെക്കോര്‍ഡ് കുറിച്ചു. എം.എ സ്‌പോര്‍ട്‌സ് അക്കാദമിയിലെ ഗായത്രി ശിവകുമാറും പെണ്‍കുട്ടികളുടെ ഹൈജംപില്‍ റെക്കോര്‍ഡ് മറികടന്ന പ്രകടനം കാഴ്ചവച്ചു.
അണ്ടര്‍ 14 പെണ്‍കുട്ടികളുടെ വിഭാഗത്തില്‍ മലബാര്‍ സ്‌പോര്‍ട്‌സ് അക്കാദമിയാണ് ഒന്നാം സ്ഥാനത്ത്. 16 വയസില്‍ താഴെയുള്ള പെണ്‍കുട്ടികളുടെ വിഭാഗത്തില്‍ പാലക്കാട് ഒളിംപിക്‌സ് സ്‌പോര്‍ട്‌സ് അക്കാദമി ഒന്നാമതെത്തി. പറളി സ്‌പോര്‍ട്‌സ് അക്കാദമിയാണ് രണ്ടാം സ്ഥാനത്ത്. അണ്ടര്‍ 18 പെണ്‍കുട്ടികളുടെ വിഭാഗത്തില്‍ മലബാര്‍ സ്‌പോര്‍ട്‌സ് അക്കാദമിയാണ് ഒന്നാം സ്ഥാനത്ത്.