പാലക്കാട്: ഈ വര്‍ഷം പാലക്കാട് ജില്ലയില്‍ നടക്കാനിരിക്കുന്ന സംസ്ഥാനതല കര്‍ഷകദിനാചരണവും കര്‍ഷക അവാര്‍ഡ് വിതരണവുമായി ബന്ധപ്പെട്ട് കലക്റ്ററേറ്റ് കോണ്‍ഫറന്‍സ് ഹാളില്‍ ചേര്‍ന്ന സംഘാടകസമിതി യോഗം നിയമ, സാംസ്‌ക്കാരിക വകുപ്പ് മന്ത്രി എ.കെ ബാലന്‍ ഉദ്ഘാടനം ചെയ്തു. കര്‍ഷകദിനാഘോഷത്തിന്റെ ലോഗോ മന്ത്രി എം.എല്‍.എ കെ. കൃഷ്ണന്‍കുട്ടിക്ക് നല്കി പ്രകാശനം ചെയ്തു. ഓഗസ്റ്റ് 16 ന് പാലക്കാട് ടൗണ്‍ഹാളില്‍ നടക്കുന്ന കര്‍ഷകദിനത്തിന്റെ ഉദ്ഘാടനം വൈകിട്ട് അഞ്ചിന് മുഖ്യമന്ത്രി പിണറായി വിജയന്‍ നിര്‍വഹിക്കും. കാര്‍ഷിക വികസന കര്‍ഷക ക്ഷേമ വകുപ്പ് മന്ത്രി വി.എസ് സുനില്‍ കുമാര്‍ അധ്യക്ഷനാകും.
2015-16 വര്‍ഷത്തെ കര്‍ഷക പുരസ്‌കാര വിതരണം, ജൈവ കൃഷിയ്ക്ക് പ്രാധാന്യം നല്‍കുന്ന കാര്‍ഷിക പ്രദര്‍ശനം, തെങ്ങുകയറ്റമത്സരം, കൃഷിയെ സംബന്ധിച്ച സെമിനാറുകള്‍, കലാപരിപാടികള്‍ എന്നിവയുണ്ടണ്ടാകും. മന്ത്രി എ.കെ ബാലന്‍ ചെയര്‍മാനുള്ള സ്വാഗത സംഘം രൂപീകരണത്തില്‍ കാര്‍ഷിക വികസന കര്‍ഷക ക്ഷേമ വകുപ്പ് മന്ത്രി വി.എസ് സുനില്‍ കുമാര്‍ മുഖ്യരക്ഷാധികാരിയാണ്.
യോഗത്തില്‍ എം.എല്‍.എ കെ. കൃഷ്ണന്‍ കുട്ടി അധ്യക്ഷനായി. കൃഷി ഡയറക്ടര്‍ സുനില്‍കുമാര്‍ പദ്ധതി വിശദീകരണം നടത്തി. എം.എല്‍.എമാരായ കെ.വി വിജയദാസ്, കെ. ബാബു, ജില്ലാ കലക്ടര്‍ പി. മേരിക്കുട്ടി, ജില്ലാ പഞ്ചായത്ത് പ്രസിഡന്റ് അഡ്വ. കെ ശാന്തകുമാരി, പാലക്കാട് നഗരസഭ അധ്യക്ഷ പ്രമീള ശശിധരന്‍, പ്രിന്‍സിപ്പല്‍ കൃഷി ഓഫിസര്‍ എം.ഡി തിലകന്‍, കൃഷി ഡെപ്യൂട്ടി ഡയറക്ടര്‍ ലിസ മാത്യു, എ.ഡി.എം എസ് വിജയന്‍, ഡെപ്യൂട്ടി കലക്ടര്‍ ഡോ. റെജില്‍, ട്രെയ്‌നി സബ് കലക്ടര്‍ ഉമേഷ് പങ്കെടുത്തു.