കൊണ്ടോട്ടി: വിദ്യാലയങ്ങള്‍ കേന്ദ്രീകരിച്ച് വിദ്യാര്‍ഥികള്‍ക്ക് വില്‍പനക്ക് കൊണ്ടുവന്ന 1.5കിലോ കഞ്ചാവുമായി മൂന്നുപേരെ മലപ്പുറം ഡി.വൈ.എസ്.പി ജലീല്‍ തോട്ടത്തിലിന്റെ നേതൃത്വത്തിലുള്ള പ്രത്യേക അന്വേഷണ സംഘം കൊണ്ടോട്ടിയില്‍ പിടികൂടി. തോട്ടശ്ശേരിയറ പനക്കല്‍ അനീഷ്(33), തോട്ടശ്ശേരിയറ നമ്പന്‍കുന്നന്‍ ഫൈസല്‍(37), കൊണ്ടോട്ടി പഴയങ്ങാടി പേങ്ങാടന്‍ മുഹമ്മദ് ഷഹീദ്(21) എന്നിവരാണ് അറസ്റ്റിലായത്.
നാലു മാസം മുന്‍പ് കൊണ്ടോട്ടിയിലെ പ്രമുഖ സ്‌കൂളിലെ ഒരു വിദ്യാര്‍ഥിയില്‍ നിന്നും അധ്യാപകര്‍ കഞ്ചാവ് പിടികൂടിയിരുന്നു. തുടര്‍ന്ന് രക്ഷിതാക്കളുടേയും അധ്യാപകരുടേയും നേതൃത്വത്തില്‍ ജില്ലാ പൊലിസ് മേധാവി പ്രതീഷ് കുമാര്‍ നര്‍ക്കോട്ടിക്ക് സെല്‍ ഡി.വൈ.എസ്.പി സലീം, കൊണ്ടോട്ടി സി.ഐ എം. മുഹമ്മദ് ഹനീഫ എന്നിവര്‍ക്ക് പരാതി നല്‍കിയിരുന്നു.
തുടര്‍ന്ന് നടത്തിയ അന്വേഷണത്തില്‍ വിദ്യാര്‍ഥികള്‍ക്ക് കഞ്ചാവ് എത്തിച്ചു നല്‍കിയിരുന്നത് കൊണ്ടോട്ടി ഭാഗത്തെ പ്രായപൂര്‍ത്തിയാകാത്ത ചില കുട്ടികളാണെന്ന് മനസിലായി. ഇവരെ മൂന്ന് മാസത്തോളമായി നീരിക്ഷിച്ചു വന്നതില്‍ നിന്നാണ് ഇവര്‍ക്ക് കഞ്ചാവ് വില്‍പനക്കായി നല്‍കിയിരുന്നത് അനീഷാണെന്ന് മനസിലായത്. ഇയാളെ ഒരു മാസത്തോളമായി നിരീക്ഷിച്ചുവരികയായിരുന്നു. ഇന്നലെ കഞ്ചാവുമായി ഇയാള്‍ വരുന്നുണ്ടെന്ന രഹസ്യവിവരം കിട്ടിയതിന്റെ അടിസ്ഥാനത്തില്‍ അനീഷുള്‍പ്പെടെ മൂന്നുപേര്‍ സഞ്ചരിച്ച ഓട്ടോറിക്ഷയടക്കം പിടികൂടുകയായിരുന്നു.
പൊലിസ് ചോദ്യം ചെയ്തതില്‍ ഇയാള്‍ വില്‍പ്പനക്കായി ഉപയോഗിച്ചിരുന്ന കുട്ടികളെ കുറിച്ച് വ്യക്തമായ സൂചന ലഭിച്ചിട്ടുണ്ട്. ഇവരുടെ രക്ഷിതാക്കളെ സ്റ്റേഷനിലേക്ക് വിളിപ്പിച്ചിട്ടുണ്ട്. കഞ്ചാവ് ഉപയോഗിച്ചുവന്ന കുട്ടികളെക്കുറിച്ചും വ്യക്തമായ വിവരം ലഭിച്ചിട്ടുണ്ട്.പ്രതികളെ ഇന്ന് കോടതിയില്‍ ഹാജരാക്കും. കൂടുതല്‍ അന്വേഷണത്തിനായി കസ്റ്റഡിയില്‍ വാങ്ങും. മൂന്ന് ദിവസം മുന്‍പ്് കൊണ്ടോട്ടിയില്‍ വിതരണനത്തിന് കൊണ്ടുവന്ന മയക്കുഗുളികകളുമായി വണ്ടൂര്‍ സ്വദേശി അഭിലാഷിനെ പിടികൂടിയിരുന്നു.
പ്രത്യേക അന്വേഷണ സംഘാംഗങ്ങളായ അബ്ദുല്‍ അസീസ്, സത്യനാഥന്‍ മനാട്ട്, ശശി കുണ്ടറക്കാട്, ഉണ്ണികൃഷ്ണന്‍ മാരാത്ത്, പി. സഞ്ജീവ് എന്നിവര്‍ക്കു പുറമെ സന്തോഷ് എന്നിവരാണ് പ്രതികളെ പിടികൂടിയത്.