തിരുവനന്തപുരം: മഴ കുറഞ്ഞതുകൊണ്ട് ജാഗ്രത കുറയാന്‍ പാടില്ലെന്ന് മുഖ്യമന്ത്രി പിണറായി വിജയന്‍. ഒന്നുരണ്ട് ദിവസം കൂടി ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം. അതിനാല്‍ രണ്ടുദിവസംകൂടി ജാഗ്രത പുലര്‍ത്തണം. ദുരന്തനിവാരണ അതോറിറ്റിയുടെയും കാലാവസ്ഥാ നിരീക്ഷണ കേന്ദ്രത്തിന്റെയും മുന്നറിയിപ്പുകള്‍ ഗൗരവത്തോടെ കാണണം.

തമിഴ്‌നാടിന്റെ ഷോളയാര്‍ ഡാമില്‍ കനത്ത മഴമൂലം വെള്ളം നിറഞ്ഞിരിക്കുകയാണ്. അത് തുറന്നുവിടുമെന്നുള്ള മുന്നറിയിപ്പ് തമിഴ്‌നാട്ടില്‍നിന്ന് വന്നിട്ടുണ്ട്. അങ്ങനെവന്നാല്‍ ആ വെള്ളം പറമ്പിക്കുളത്തേക്കും തുടര്‍ന്ന് കേരളത്തിലെ പെരിങ്ങല്‍കുത്തിലേക്കും വരും. ചാലക്കുടി പുഴയില്‍ വെള്ളം കയറാന്‍ സാധ്യതയുള്ളതിനാല്‍ ജാഗ്രത വേണം.

മലയോരമേഖലകളില്‍ ശക്തമായ മഴയ്ക്ക് സാധ്യതയുള്ളതിനാല്‍ പ്രത്യേക ശ്രദ്ധ ആവശ്യമാണ്. മലയിടിച്ചില്‍ പെട്ടെന്ന് ഉണ്ടാകുന്നതാണ്. അതില്‍നിന്ന് തെന്നിമാറുക ഏറെ പ്രയാസകരമാണ്. അതുകൊണ്ടാണ് അത്തരം അപകടമേഖലകളില്‍ നിന്ന് മുന്നറിയിപ്പ് കിട്ടിയാലുടന്‍ മാറാന്‍ ജനങ്ങള്‍ തയാറാകണമെന്ന് ആവര്‍ത്തിക്കുന്നത്. മലപ്പുറം നിലമ്പൂരിലെ അംബിട്ടാംപുട്ടിയിലുണ്ടായ ഉരുള്‍പൊട്ടലില്‍ നൂറോളം വീടുകളാണ് ഒലിച്ചുപോയത്. എന്നാല്‍, ജനങ്ങളെ ഒഴിപ്പിച്ചതിനാല്‍ ആളപായമില്ല. കുട്ടനാട്ടില്‍ നിലവില്‍ അപകടസ്ഥിതിയില്ലാത്തതിനാല്‍ ആശങ്ക വേണ്ട. കേന്ദ്രം ഇടപെടല്‍ നടത്തുന്നുണ്ടെന്നും മുഖ്യമന്ത്രി പറഞ്ഞു.  

 

 

തിരുവനന്തപുരം: ദുരിതാശ്വാസ ക്യാംപുകളിലേക്ക് ഇപ്പോള്‍ സാധനങ്ങള്‍  ശേഖരിക്കേണ്ടെന്ന തിരുവനന്തപുരം ജില്ലാ കലക്ടര്‍ കെ. ഗോപാലകൃഷ്ണന്റെ നിലപാടിനെ ശക്തമായി പിന്തുണച്ച് മുഖ്യമന്ത്രി പിണറായി വിജയന്‍ രംഗത്ത്. ഉചിതമായ നിലപാടാണ് കലക്ടറുടേത്. 

കേരളത്തില്‍ കാലവര്‍ഷക്കെടുതി ആരംഭിച്ച ദിവസമാണ് കലക്ടറെ ചിലര്‍ വിളിക്കുകയും ദുരിതാശ്വാസ സാമഗ്രികള്‍ നല്‍കാമെന്നും അറിയിച്ചത്. എന്നാല്‍, ഇപ്പോള്‍ രക്ഷാപ്രവര്‍ത്തനത്തിനാണ് ശ്രദ്ധയെന്നും അവിടെ ഏതെങ്കിലും തരത്തിലുള്ള സഹായങ്ങള്‍ എത്തിക്കേണ്ടതില്ലെന്നും ആവശ്യം വരുമ്പോള്‍ ഉപയോഗിക്കാമെന്നുമാണ് കലക്ടര്‍ പറഞ്ഞത്.  ഇപ്പോള്‍ വേണ്ട എന്നുപറഞ്ഞതിനെ സഹായമേ വേണ്ട എന്ന തരത്തില്‍ കലക്ടര്‍ പറഞ്ഞുവെന്ന് പ്രചരിപ്പിക്കുകയാണ്. 

ശരിയായ ഒരു വസ്തുതയെ എത്രമാത്രം വക്രീകരിക്കുന്നുവെന്നതിന്റെ ഉത്തമ ഉദാഹരണമാണിത്. അത് തെറ്റിദ്ധരിപ്പിക്കലാണ്. കലക്ടര്‍ ഫേസ്ബുക്ക് ലൈവിലൂടെ പറഞ്ഞത് എന്താണെന്ന് താന്‍ കേട്ടിരുന്നു. ഒരുതരത്തിലുള്ള തെറ്റിദ്ധാരണയ്ക്കും ഇടയില്ലാത്ത വിധമാണ് അദ്ദേഹം പറഞ്ഞതെന്നും മുഖ്യമന്ത്രി വിശദീകരിച്ചു.