ഹരിപ്പാട്: ഇടിമിന്നലേറ്റ് രണ്ടു പേര്‍ക്ക് പരിക്കേറ്റു. 15 ഓളം വീടുകളിലെ ഇലക്ട്രിക് ഉപകരണങ്ങള്‍ക്ക് കേടുപാടുകള്‍ സംഭവിച്ചു.
കരുവാറ്റ ഗ്രാമ പഞ്ചായത്ത് എട്ടാം വാര്‍ഡിലെ കീച്ചേരില്‍ കോളനി ഭാഗത്താണ് ഇന്നലെ പകല്‍ 12 മണിയോടെ ശക്തമായ ഇടിമിന്നലുണ്ടായത്. കീച്ചേരില്‍ പടീറ്റതില്‍ ഷാജി (42), ഭാര്യാമാതാവ് രത്‌നമ്മ (65) എന്നിവര്‍ക്കാണ് പരിക്കേറ്റത്. ഇവരെ ഹരിപ്പാട് ഗവ.ആശുപത്രിയില്‍ പ്രവേശിപ്പിച്ചു. ഇവരുടെ വീടിന്റെ അടുക്കള, ചിമ്മിനി എന്നിവയ്ക്ക് പൊട്ടലുണ്ടായി. വീട്ടിലെ കാലിതൊഴുത്തും മിന്നലില്‍ തകര്‍ന്നു. ഫ്രിഡ്ജ്, മിക്‌സി, ടി.വി എന്നിവയും നശിച്ചു. ഏകദേശം ഒന്നര ലക്ഷം രൂപയുടെ നഷ്ടം സംഭവിച്ചതായി കണക്കാക്കുന്നു. സമീപത്തുള്ള കീച്ചേരില്‍ കോളനിയിലെ 15 ഓളം വീടുകള്‍ക്കും കേടുപാടുകള്‍ സംഭവിച്ചു. മിക്ക വീടുകളിലേയും ഇലക്ട്രിക് വയറിംഗുകളും, ടി.വി, ഫ്രിഡ്ജ്, മിക്‌സി തുടങ്ങിയ വൈദ്യുത ഉപകരണങ്ങളും കത്തിനശിച്ചു.
കരുവാറ്റ ഗ്രാമ പഞ്ചായത്ത് പ്രസിഡന്റ് സി.സുജാത, വാര്‍ഡംഗം കെ.സുലോചന, വില്ലേജ് ഓഫീസര്‍മാരായ ബഷീര്‍, ശൈലേഷ് കുമാര്‍ എന്നിവര്‍ അപകടസ്ഥലം സന്ദര്‍ശിച്ച് രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കി.