ഫറോക്ക്: പ്രളയ ദുരിത ബാധിതര്‍ക്ക് റവന്യു അധികൃതര്‍ വിതരണം ചെയ്ത തലയിണയില്‍ നിറയെ കോഴിത്തൂവല്‍.
ബേപ്പൂര്‍ നടുവട്ടം മുണ്യാര്‍ വയല്‍ തുണ്ടത്തില്‍ ത്രേ്യസ്യക്കു ലഭിച്ച തലയിണയിലാണ് ദുര്‍ഗന്ധം വമിക്കുന്ന കോഴി അവശിഷ്ടം കണ്ടെത്തിയത്. ശനിയാഴ്ച ബേപ്പൂര്‍ വില്ലേജ് ഓഫിസില്‍ നിന്നു ലഭിച്ച ടോക്കണ്‍ പ്രകാരമാണ് നടുവട്ടം മാഹി ഗോഡൗണില്‍ നിന്ന് ത്രേ്യസ്യ ദുരിതാശ്വാസ സാധനങ്ങള്‍ കൈപ്പറ്റിയത്. വലിയ കിറ്റില്‍ തലയണക്കു പുറമേ ബ്രഷ്, സോപ്പ്, പേസ്റ്റ്, പാന്റ് തുണി എന്നിവയും ഉണ്ടായിരുന്നു. ഞായറാഴ്ച വീട്ടില്‍ സൂക്ഷിച്ച മുറിയില്‍ നിന്ന് ദുര്‍ഗന്ധം പരന്നതോടെ തുറന്നു പരിശോധിച്ചപ്പോഴാണ് തലയിണയില്‍ നിന്നു കോഴിത്തൂവല്‍ കണ്ടെത്തിയത്. ഇതോടെ പ്രദേശവാസികള്‍ ആശങ്കയിലാണ്. നിരവധി കുടുംബങ്ങള്‍ക്കാണ് ഇവിടെ നിന്ന് സമാനമായ കിറ്റുകള്‍ ലഭിച്ചിട്ടുള്ളത്.
ഇക്കാര്യം വില്ലേജ് അധികൃതരെ അറിയിച്ചെങ്കിലും അതേ കുറിച്ച് അറിയില്ലെന്നായിരുന്നു മറുപടി. നിലവില്‍ മൂന്നിലേറെ ആളുകള്‍ക്കാണ് ഇത്തരത്തില്‍ ദുര്‍ഗന്ധം വമിക്കുന്ന കിറ്റുകള്‍ ലഭിച്ചത്.