കോഴിക്കോട്: സംസ്ഥാന സര്‍ക്കാരിന്റെ ഒന്നാം വാര്‍ഷികാഘോഷത്തിന്റെ സമാപനം ഇന്നു വൈകിട്ട് അഞ്ചിന് കോഴിക്കോട് മലബാര്‍ ക്രിസ്ത്യന്‍ കോളജ് മൈതാനിയില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. റവന്യൂ മന്ത്രി ഇ. ചന്ദ്രശേഖരന്‍ അധ്യക്ഷനാകും. പത്മശ്രീ ജേതാക്കളായ ഗുരു ചേമഞ്ചേരി കുഞ്ഞിരാമന്‍ നായര്‍, മീനാക്ഷി ഗുരുക്കള്‍ എന്നിവരെ ചടങ്ങില്‍ മുഖ്യമന്ത്രി ആദരിക്കും. സര്‍ക്കാറിന്റെ ഒരു വര്‍ഷത്തെ പ്രവര്‍ത്തന പുരോഗതി അവലോകന റിപ്പോര്‍ട്ട് സംവിധായകന്‍ രഞ്ജിത്തിന് നല്‍കി പിണറായി വിജയന്‍ പ്രകാശനം ചെയ്യും.
മന്ത്രിമാരായ ടി.പി രാമകൃഷ്ണന്‍, ഡോ. ടി.എം തോമസ് ഐസക്, കടകംപള്ളി സുരേന്ദ്രന്‍, തോമസ് ചാണ്ടി, മാത്യു ടി. തോമസ്, രാമചന്ദ്രന്‍ കടന്നപ്പള്ളി, എം.പിമാരായ എം.കെ രാഘവന്‍, എം.പി വീരേന്ദ്രകുമാര്‍, മുല്ലപ്പള്ളി രാമചന്ദ്രന്‍, എം.ഐ ഷാനവാസ്, പ്രതിപക്ഷ ഉപനേതാവ് ഡോ. എം.കെ മുനീര്‍, മേയര്‍ തോട്ടത്തില്‍ രവീന്ദ്രന്‍ സംസാരിക്കും.
എ. പ്രദീപ് കുമാര്‍ എം.എല്‍.എ സ്വാഗതവും ജില്ലാ കലക്ടര്‍ യു.വി ജോസ് നന്ദിയും പറയും. എം.എല്‍.എമാരായ സി.കെ നാണു, എ.കെ ശശീന്ദ്രന്‍, ഇ.കെ വിജയന്‍, പി.ടി.എ റഹീം, ജോര്‍ജ് എം. തോമസ്, കെ. ദാസന്‍, വി.കെ.സി മമ്മദ് കോയ, പുരുഷന്‍ കടലുണ്ടി, പാറക്കല്‍ അബ്ദുല്ല, കാരാട്ട് റസാഖ്, ജില്ലാ പഞ്ചായത്ത് പ്രസിഡന്റ് ബാബു പറശ്ശേരി സംബന്ധിക്കും.