ദേശമംഗലം: ചെറുതുരുത്തി പൊന്നാനി സംസ്ഥാന പാതയില്‍ ദേശമംഗലം കൂട്ടുപാതയില്‍ ഓട്ടോറിക്ഷയും ചരക്ക് ലോറിയും കൂട്ടിയിടിച്ച് ഓട്ടോറിക്ഷ യാത്രക്കാരായ ഒരു കുടുംബത്തിലെ നാലു പേര്‍ക്ക് പരുക്കേറ്റു. മലപ്പുറം വളയംകുളം സ്വദേശികളായ നരി പറമ്പില്‍ വീട്ടില്‍ സുബ്രഹ്മണ്യന്‍ (42), ഭാര്യ സൗമ്യ (39), മക്കളായ അര്‍ച്ചന (8), കാവ്യ (2) എന്നിവര്‍ക്കാണ് പരുക്കേറ്റത്. ഇതില്‍ സുബ്രഹ്മണ്യന്റെ പരുക്ക് സാരമുള്ളതാണ്. സംസാര വൈകല്യമുള്ള മകള്‍ അര്‍ച്ചനയെ പാലക്കാട് വള്ളുവനാടുള്ള സ്വകാര്യ ആശുപത്രിയിലേക്ക് ചികിത്സക്ക് കൊണ്ടുവരുന്നതിനിടയിലായിരുന്നു അപകടം. ഓട്ടോറിക്ഷ പൂര്‍ണമായും തകര്‍ന്നു. മൈസൂരില്‍നിന്ന് ചരക്കുമായി വന്നിരുന്ന ലോറിയാണ് അപകടം വിതച്ചത്. ഓട്ടോറിക്ഷയില്‍ കുടുങ്ങിയവരെ ഓടിക്കൂടിയെത്തിയ നാട്ടുകാരാണ് പുറത്തെടുത്ത് ആശുപത്രിയില്‍ പ്രവേശിപ്പിച്ചത്. ചെറുതുരുത്തി പൊലിസ് സ്ഥലത്തെത്തി മേല്‍ നടപടികള്‍ സ്വീകരിച്ചു.