കാഞ്ഞങ്ങാട്: തെരുവ് നായയുടെ കടിയേറ്റു മൂന്നുപേരെ കാഞ്ഞങ്ങാട് ജില്ലാ ആശുപത്രിയില്‍ പ്രവേശിപ്പിച്ചു. കൊടക്കാട് വേങ്ങാപ്പാറയിലെ ശ്രീജിത്ത് (34), ഭാര്യ രമ്യ (28), ദേവദര്‍ശ്(7) എന്നിവരെയാണ് തെരുവ് നായയുടെ കടിയേറ്റ് പരുക്കുകളോടെ ആശുപത്രിയില്‍ പ്രവേശിപ്പിച്ചത്.
കഴിഞ്ഞ ദിവസം രാവിലെ പതിനൊന്നോടെയാണ് ശ്രീജിത്തിനും രമ്യക്കും നായയുടെ കടിയേറ്റത്. ഇയാളുടെ വീട്ടിലെത്തിയ തെരുവ് നായ ആദ്യം ശ്രീജിത്തിനെ അക്രമിക്കുകയായിരുന്നു. ഇയാളെ കാഞ്ഞങ്ങാട് ജില്ലാ ആശുപത്രിയില്‍ ബന്ധുക്കള്‍ കൊണ്ടുപോയ ശേഷം ഒരു മണിക്കൂറോളം പിന്നിട്ടപ്പോഴാണ് നായ തിരികെയെത്തി വീട്ടിലുണ്ടായിരുന്ന രമ്യയെ അക്രമിച്ചത്. വൈകിട്ട് നാലിനാണ് ഇവരുടെ മകന്‍ ദേവദര്‍ശനെ നായ അക്രമിച്ചത്. മൂന്നു പേരെയും കടിച്ചത് ഒരേ നായയാണെന്ന വിശ്വാസത്തിലാണ് പ്രദേശ വാസികള്‍. നായയെ പിടികൂടാന്‍ പ്രദേശ വാസികള്‍ ശ്രമം നടത്തിയെങ്കിലും വിജയിച്ചില്ല.
ഇതിനുപുറമേ ഉപ്പിലിക്കൈയിലെ കാര്‍ത്യായനിയുടെ വളര്‍ത്തു പൂച്ചയെ മൂന്നോളം നായകള്‍ ചേര്‍ന്ന് കടിച്ചു കീറി. ഇതേ നായകള്‍ മോനാച്ചയിലെ ഒരു വീട്ടിലെ മൂന്നു കോഴികളെയും കൊന്നു.
അതേസമയം നഗര പരിധിയിലും വിവിധ പഞ്ചായത്ത് പരിധിയിലും തെരുവ് നായകള്‍ കൂട്ടമായി സൈ്വര വിഹാരം നടത്തുകയാണ്. കോട്ടച്ചേരി മത്സ്യ മാര്‍ക്കറ്റ്, റെയില്‍വേ സ്റ്റേഷന്‍ പരിസരം ഉള്‍പ്പെടെയുള്ള ഭാഗങ്ങളില്‍ അന്‍പതിലധികം അക്രമികാരികളായ തെരുവ് നായകളാണുള്ളത്.
പുല്ലൂര്‍ പെരിയ ഗ്രാമ പഞ്ചായത്ത്, അജാനൂര്‍,പള്ളിക്കര പഞ്ചായത്ത് പരിധികളില്‍ വിവിധ വാര്‍ഡുകളിലും തെരുവ് നായകള്‍ കൂട്ടം കൂട്ടമായി ആളുകളെ ഭീതിയിലാഴ്ത്തുന്നുണ്ട്. കുട്ടികള്‍ സ്‌കൂളുകളില്‍ പോകുന്ന വഴികളില്‍ നായകള്‍ കൂട്ടമായി സഞ്ചരിക്കുന്നതും ഇവര്‍ക്ക് നേരെ പാഞ്ഞടുക്കുന്നതും കൂടിയിരിക്കുകയാണ്.
എന്നാല്‍ നായകളെ നിയന്ത്രിക്കാനോ ഇവയെ പിടിക്കാനോ ബന്ധപ്പെട്ട തദ്ദേശ സ്ഥാപനങ്ങള്‍ നടപടിയെടുക്കാത്തത് ജനങ്ങളില്‍ കടുത്ത പ്രതിഷേധം ഉയര്‍ത്തിയിട്ടുണ്ട്.