തിരുവനന്തപുരം: ശബരിമലയില്‍ എല്ലാ പ്രായത്തിലുമുള്ള സ്ത്രീകളെ പ്രവേശിപ്പിക്കണമെന്ന സുപ്രിംകോടതി വിധിക്കെതിരേ നിയമ നടപടി സ്വീകരിക്കുന്നതിനെക്കുറിച്ച് ആലോചിക്കുമെന്നും 19ന് ബോര്‍ഡ് യോഗം ചേരുമെന്ന ദേവസ്വം ബോര്‍ഡ് പ്രസിഡന്റിന്റെ അഭിപ്രായത്തെ തള്ളിയും അംഗം കെ. രാഘവന്‍.
തന്ത്രി കുടുംബവും പന്തളം കൊട്ടാരം പ്രതിനിധികളും മറ്റുമായി, കഴിഞ്ഞദിവസം ദേവസ്വം ബോര്‍ഡ് നടത്തിയ സമവായ ചര്‍ച്ച പരാജയപ്പെട്ടിരുന്നു. ഈ ചര്‍ച്ചക്ക് ശേഷം, 19ന് ബോര്‍ഡ് യോഗം വിളിച്ചിട്ടുണ്ടെന്നും അന്ന് അഭിഭാഷകരുമായി കൂടിയാലോചിച്ച് നിയമ നടപടിയെക്കുറിച്ച് തീരുമാനിക്കുമെന്നും ദേവസ്വം ബോര്‍ഡ് പ്രസിഡന്റ് കെ. പദ്മകുമാര്‍ പറഞ്ഞിരുന്നു. എന്നാല്‍ ഇതിനു കടകവിരുദ്ധമായ അഭിപ്രായമാണ് ഇന്നലെ ബോര്‍ഡ് അംഗമായ കെ. രാഘവന്‍ പറഞ്ഞത്.
റിവ്യൂ ഹരജിയെക്കുറിച്ചോ നിയമ നടപടിയെക്കുറിച്ചോ ബോര്‍ഡ് ആലോചിക്കുന്നില്ലെന്നും 19ന് ബോര്‍ഡ് യോഗം ചേരേണ്ട ആവശ്യമില്ലെന്നും രാഘവന്‍ പറഞ്ഞു.
പന്തളം കൊട്ടാരം പ്രതിനിധികളും തന്ത്രി കുടുംബവും ചര്‍ച്ച അവസാനിപ്പിച്ചുപോയ സ്ഥിതിക്ക് ബോര്‍ഡ് യോഗം ചേരേണ്ട ആവശ്യമില്ല.
അവര്‍ മുന്നോട്ടുവച്ച ആവശ്യങ്ങളെക്കുറിച്ച് ചര്‍ച്ച ചെയ്യുന്നതിനാണ് ബോര്‍ഡ് യോഗം ചേരാന്‍ തീരുമാനിച്ചിരുന്നതെന്നും അവരുമായുള്ള ചര്‍ച്ച പരാജയപ്പെട്ട സാഹചര്യത്തില്‍ ബോര്‍ഡ് യോഗം ചേരേണ്ട ആവശ്യമില്ലെന്നും രാഘവന്‍ പറഞ്ഞു.