ന്യൂഡല്‍ഹി: അന്താരാഷ്ട്ര മത്സരങ്ങള്‍ക്കുള്ള ഇടവേളക്ക് ശേഷം ഇന്നലെ മുതല്‍ വീണ്ടും ഐ.എസ്.എല്‍ മത്സരങ്ങള്‍ക്ക് തുടക്കമായി. ഇന്നു രാത്രി ഏഴിന് നടക്കുന്ന മത്സരത്തില്‍ ചെന്നൈയിന്‍ സിറ്റി എഫ്.സിയും നോര്‍ത്ത് ഈസ്റ്റ് യുനൈറ്റഡും തമ്മില്‍ ഏറ്റുമുട്ടും.
കളിച്ച രണ്ട് മത്സരങ്ങളിലും പരാജയപ്പെട്ട ചെന്നൈയിന്‍ എഫ്.സിക്ക് ഇന്നത്തേത് ജീവന്‍ മരണപോരാട്ടമായിരിക്കും. ആദ്യ മത്സരത്തില്‍ ബംഗളൂരു എഫ്.സിയോട് 1-0ത്തിനും രണ്ടാം മത്സരത്തില്‍ ഗോവയോട് 3-1 എന്ന സ്‌കോറിനുമായിരുന്നു ചെന്നൈയിന്‍ എഫ്.സി പരാജയപ്പെട്ടത്. രണ്ട് മത്സരങ്ങളും ചെന്നൈയിന്‍ എഫ്.സിയുടെ ഹോം ഗ്രൗണ്ടില്‍ നടന്ന മത്സരങ്ങളായിരുന്നു. സീസണില്‍ ഇതുവരെ ജയം കണ്ടെത്താനാകാത്തതില്‍ ടീം കടുത്ത സമ്മര്‍ദത്തിലാണ്. പോയിന്റൊന്നുമില്ലാതെ പട്ടികയില്‍ ഒന്‍പതാം സ്ഥാനത്താണ് ചെന്നൈയിന്‍ എഫ്.സിയുള്ളത്. സീസണിലെ ഏറ്റവും മോശം പ്രകടനം നടത്തിയ എ.ടി.കെയാണ് പട്ടികയില്‍ അവസാന സ്ഥാനത്തുള്ളത്.
അതേസമയം, രണ്ടു മത്സരം കളിച്ച നോര്‍ത്ത് ഈസ്റ്റ് യുനൈറ്റഡ് നാലു പോയിന്റുമായി പട്ടികയില്‍ ആറാം സ്ഥാനത്തുണ്ട്. ഗോവയും നോര്‍ത്ത് ഈസ്റ്റും തമ്മിലുള്ള ആദ്യ മത്സരം 2-2 എന്ന സ്‌കോറിന് സമനിലയില്‍ കലാശിച്ചു. രണ്ടാം മത്സരത്തില്‍ എതിരില്ലാത്ത ഒരു ഗോളിന് എ.ടി.കെയെയാണ് പരാജയപ്പെടുത്തിയത്.
നോര്‍ത്ത് ഈസ്റ്റും ചെന്നൈയിനും തമ്മില്‍ ഇന്ന് കടുത്ത മത്സരം പ്രതീക്ഷിക്കാം. ചെന്നൈ ജവഹര്‍ലാല്‍ നെഹ്‌റു സ്റ്റേഡിയത്തിലാണ് മത്സരം നടക്കുക.
നാളെ രാത്രി നടക്കുന്ന മത്സരത്തില്‍ മുംബൈ സിറ്റിയും പൂനെ സിറ്റിയും തമ്മിലാണ് മത്സരം. പോയിന്റ് പട്ടികയില്‍ യഥാക്രമം ഏഴും എട്ടും സ്ഥാനത്താണ് പൂനെയും മുംബൈയുമുള്ളത്. രണ്ട് മത്സരങ്ങളില്‍ നിന്ന് ഒരു ജയവും ഒരു തോല്‍വിയുമാണ് മുംബൈക്കുള്ളത്. ഒരു മത്സരം മാത്രം കളിച്ച പൂനെ സിറ്റിയുടെ മത്സരം സമനിലയില്‍ കലാശിക്കുകയായിരുന്നു.