കോഴിക്കോട്: ഇത്തവണത്തെ റവന്യൂ ജില്ലാ കായികമേള 21, 22 തിയതികളില്‍ നടക്കും. കോഴിക്കോട് മെഡിക്കല്‍ കോളജ് ഒളിംപ്യന്‍ റഹ്മാന്‍ സ്റ്റേഡിയത്തില്‍വച്ചാണ് കായികമേള നടക്കുന്നത്. പ്രളയത്തിന്റെ പശ്ചാത്തലത്തില്‍ ഉദ്ഘാടന ചടങ്ങുകളില്ലാതെ ലളിതമായാണു മേള നടത്തുക.
ശാസ്ത്രമേള നവംബര്‍ എട്ടിനും ഒന്‍പതിനും മര്‍ക്കസ് ബോയ്‌സ് ആന്‍ഡ് ഗേള്‍സ് എച്ച്.എസ്.എസ്, കുന്ദമംഗലം എച്ച്.എസ്.എസ്, എ.യു.പി.എസ് കുന്ദമംഗലം എന്നിവിടങ്ങളിലും നടക്കും. ശാസ്‌ത്രോത്സവത്തിന്റെ സ്വാഗതസംഘം രൂപീകരണം 26ന് മര്‍ക്കസ് എച്ച്.എസ്.എസില്‍ നടക്കും.
വടകര, കോഴിക്കോട്, താമരശേരി വിദ്യാഭ്യാസ ജില്ലകളിലെ വിദ്യാര്‍ഥികളാണു കലാ, കായിക, ശാസ്ത്ര മത്സരങ്ങളില്‍ മാറ്റുരയ്ക്കുക. ഏറ്റവും ലളിതമായ നിലയില്‍ ആഘോഷങ്ങള്‍ ഒഴിവാക്കിയാണു പരിപാടികള്‍ സംഘടിപ്പിച്ചിരിക്കുന്നത്.
ശാസ്ത്രമേള ഒറ്റ ദിവസത്തില്‍ ചുരുക്കാനുള്ള ശ്രമവും നടക്കുന്നുണ്ട്. കലാ കായിക ശാസ്‌ത്രോത്സവത്തിന്റെ ലോഗോ പ്രകാശനം വിദ്യാഭ്യാസ ഉപഡയരക്ടര്‍ ഇ.കെ സുരേഷ് കുമാറും മീഡിയാ കണ്‍വീനര്‍ പി.പി ഫിറോസും ചേര്‍ന്ന് നിര്‍വഹിച്ചു. ചടങ്ങില്‍ അനില്‍ കുമാര്‍ (സൂപ്രണ്ട്, ഡി.ഡി.ഇ ഓഫിസ്) എം.സി രാജീവ് കുമാര്‍ പങ്കെടുത്തു.