പട്ടിക്കാട്: ഗവ.ഹയര്‍ സെക്കന്‍ഡറി സ്‌കൂളിന് പുതിയ കെട്ടിട നിര്‍മാണത്തിനായി എഞ്ചിനീയറിങ് വിഭാഗം സ്ഥലപരിശോധന നടത്തി.സംസ്ഥാന സര്‍ക്കാറിന്റെ ബജറ്റില്‍ ഉള്‍പ്പെടുത്തിയ ഒന്നര കോടി രൂപയുടെ കെട്ടിടം നിര്‍മിക്കുന്നതിന്റെ ഭാഗമായാണ് പെരിന്തല്‍മണ്ണ ബ്ലോക്ക് എക്‌സിക്യൂട്ടീവ് എഞ്ചിനീയര്‍ എന്‍.മിനിമോളുടെ നേതൃത്വത്തിലുള്ള സംഘം സ്ഥലം സന്ദര്‍ശിച്ചത്.
നിലവില്‍ യു.പി വിഭാഗങ്ങള്‍ പ്രവര്‍ത്തിക്കുന്ന പഴയ കെട്ടിടങ്ങള്‍ക്ക് പകരമാണ് പുതിയ കെട്ടിടം വരുന്നത്. മൂന്ന് നിലകളിലുള്ള കെട്ടിടത്തില്‍ 24 ക്ലാസ്മുറികളാണ് ഉള്‍പെടുത്തുക.
ടോയ്‌ലറ്റ്, വീതി കൂടിയ കോണി, ഇടനാഴി, എന്നിവ ഉണ്ടാവും. ക്ലാസ് മുറികള്‍ പൂര്‍ണമായും ഗ്രാനെറ്റിലായിരിക്കും. ആവശ്യമായ പ്ലാനും എസ്റ്റിമേറ്റും പൂര്‍ത്തിയാവുന്ന മുറക്ക് കെട്ടിട നിര്‍മാണത്തിന് ഉടന്‍ സാങ്കേതിക അനുമതി ലഭിക്കുമെന്ന് എഞ്ചിനീയര്‍ മിനിമോള്‍ പറഞ്ഞു. പ്രധാനാധ്യാപകന്‍ കെ.ബഷീര്‍, പി.ടി.എ പ്രസിഡന്റ് നഹാസ് എം. നിസ്താര്‍, കെ.പി. യുസുഫ്, ടി.ടി സന്തോഷ്, കെ.ടി ഇസ്മായീല്‍ എന്നിവര്‍ പങ്കെടുത്തു.