നിലമ്പൂര്‍: മേഖലയില്‍ കാലവര്‍ഷം ശക്തിപ്രാപിക്കുന്നതിന് മുമ്പേ മമ്പാട് ഓടായിക്കല്‍ റഗുലേറ്റര്‍ കം ബ്രിഡ്ജിന്റെ അടച്ചിട്ട ഷട്ടറുകള്‍ ഉയര്‍ത്തി വെള്ളം തുറന്നു വിട്ടതിനെ തുടര്‍ന്ന് ജനങ്ങളുടെ പ്രതിഷേധം ശക്തമായതോടെ ഷട്ടറുകള്‍ വീണ്ടും താഴ്ത്തി. വേനല്‍ കടുത്തതിനെ തുടര്‍ന്ന് 12 ഷട്ടറുകളാണ് മുന്‍പ് താഴ്ത്തിയിരുന്നത്.
ഇതു മൂലം ചാലിയാര്‍ പുഴ, കുതിരപുഴ, കുറുവന്‍പുഴ എന്നിവിടങ്ങളില്‍ ജല വിതാനം ഉയര്‍ന്നിരുന്നു. നഗരസഭയിലുള്‍പ്പെടെ കിണറുകളിലും മറ്റും വെള്ളം ലഭ്യമാകുകയും ചെയ്തിരുന്നു. എന്നാല്‍ മഴ ആരംഭിക്കുന്നതിന് മുമ്പേ ഷട്ടറുകള്‍ ഉയര്‍ത്തുകയും ചെയ്തു. ഇതോടെ പരിസര പ്രദേശങ്ങളിലും തൊട്ടടുത്ത പഞ്ചായത്തുകളിലും ജലനിരപ്പ് വളരെ താഴ്ന്നു. മഴക്കാലം തുടങ്ങുന്നതോടെ ഷട്ടറുകള്‍ ഉയര്‍ത്തണമെന്ന് നിര്‍ദേശമുണ്ടെന്നും ഇതേ തുടര്‍ന്നാണ് ഇവ ഉയര്‍ത്തിയതെന്നും ജലസേചന വകുപ്പ് അധികൃതര്‍ അറിയിച്ചു.
എന്നാല്‍ മേഖലയില്‍ മഴ തുടങ്ങിയിട്ടില്ലെന്നും കിണറുകളും മറ്റും വരണ്ടുപോവുകയാണെന്നും, ഷട്ടറുകള്‍ താഴ്ത്തണമെന്നും ആവശ്യപ്പെട്ട് നാട്ടുകാര്‍ രംഗത്ത് വന്നു. പ്രതിഷേധം ശക്തമായതോടെ മൂന്ന് ഷട്ടറുകളൊഴികെ മുഴുവന്‍ ഷട്ടറുകളും അധികൃതര്‍ താഴ്ത്തുകയായിരുന്നു