കൊച്ചി: പൊലിസ് ഹെല്‍മറ്റും ജാക്കറ്റും ധരിപ്പിച്ചു യുവതികളെ ശബരിമല സന്നിധാനത്തേക്കു കൊണ്ടുപോയത് ആസൂത്രിത നീക്കമായിരുന്നെന്നു യു.ഡി.എഫ് കണ്‍വീനര്‍ ബെന്നി ബെഹനാന്‍. ഇത്തരത്തില്‍ സാമൂഹികസ്പര്‍ധ സൃഷ്ടിക്കാന്‍ നേതൃത്വം നല്‍കിയ ഐ.ജി എസ്. ശ്രീജിത്തിനെതിരേ കേസെടുക്കണമെന്നും അദ്ദേഹം ആവശ്യപ്പെട്ടു.
യുവതികള്‍ക്കു പൊലിസിന്റെ ജാക്കറ്റും ഹെല്‍മറ്റും നല്‍കിയതു ചട്ടലംഘനമാണ്. ഐ.ജി ശ്രീജിത്തിനു ശബരിമലയുടെ ചുമതല നല്‍കി നിയോഗിച്ചതും ശബരിമലയില്‍ പോകാന്‍ താല്‍പര്യമറിയിച്ചു രഹ്‌ന മനോജ് അധികൃതരെ സമീപിച്ചതും വ്യാഴാഴ്ച വൈകിട്ടാണ്. ഐ.ജിയുടെ നടപടികള്‍ ഒരു സംഘര്‍ഷ സമയത്ത് എടുക്കേണ്ടതല്ലായിരുന്നു. ശബരിമലയെ കലാപഭൂമിയാക്കി മാറ്റുകയെന്നതാണ് ബി.ജെ.പിയുടെയും മാര്‍ക്‌സിസ്റ്റ് പാര്‍ട്ടിയുടെയും അജന്‍ഡ. വിശ്വാസികളുടെ താല്‍പര്യങ്ങള്‍ അവഗണിച്ചു വനിതകളെ സന്നിധാനത്തെത്തിക്കാനുള്ള സര്‍ക്കാരിന്റെയും പൊലിസിന്റെയും നീക്കമായിരുന്നു ഇന്നലെ കണ്ടതെന്നും അദ്ദേഹം പറഞ്ഞു.
വാരാപ്പുഴ കേസില്‍ ശ്രീജിത്തിനെ നിയോഗിച്ചതു കേരളം കണ്ടതാണ്. ഇന്നലെ ശ്രീജിത്തിനെ ഇക്കാര്യത്തില്‍ നിയോഗിച്ചതിനു പിന്നില്‍ മുഖ്യമന്ത്രി തന്നെയാണെന്നും ഇത് ആസൂത്രിത നീക്കമായിരുന്നെന്നും ബെന്നി ബെഹനാന്‍ ആരോപിച്ചു. എല്ലാ വിഷയത്തിലും സര്‍വകക്ഷി യോഗം വിളിക്കുന്ന സര്‍ക്കാര്‍ ശബരിമലയുടെ കാര്യത്തില്‍ അതിനു തയാറാകുന്നില്ല. ശബരിമലയില്‍ സംഘര്‍ഷം രൂക്ഷമാകുമ്പോള്‍ മുഖ്യമന്ത്രി പണപ്പിരിവിനു വിദേശത്തുപോയിരിക്കുകയാണ്. അദ്ദേഹം തിരികെയെത്തി രാജിവയ്ക്കണം. സര്‍ക്കാര്‍ സുപ്രിംകോടതിയില്‍ റിവ്യൂ പെറ്റീഷന്‍ നല്‍കണമെന്നും വിശ്വാസികളുടെ താല്‍പര്യം സംരക്ഷിക്കാന്‍ ഓര്‍ഡിനന്‍സ് കൊണ്ടുവരണമെന്നും അദ്ദേഹം ആവശ്യപ്പെട്ടു.
കേന്ദ്രസര്‍ക്കാരിനോട് ഓര്‍ഡിനന്‍സ് കൊണ്ടുവരാന്‍ ആവശ്യപ്പെടാതെയും കേസില്‍ കക്ഷിചേരാതെയും ബി.ജെ.പി നടത്തുന്ന സമരം വിശ്വാസി സമൂഹത്തെ കബളിപ്പിക്കാനുള്ള ശ്രമമാണ്. ബി.ജെ.പി നടത്തുന്ന സമരത്തിനു വിശ്വാസി സമൂഹത്തിന്റെ പിന്തുണയില്ലെന്നും കോണ്‍ഗ്രസും യു.ഡി.എഫും വിശ്വാസികളുടെ താല്‍പര്യത്തിനൊപ്പമാണെന്നും അദ്ദേഹം പറഞ്ഞു.