ശ്രീനഗര്‍: കശ്മിരിന് പ്രത്യേക പദവി നല്‍കുന്ന ഭരണഘടനയിലെ 370 ാം അനുച്ഛേദം റദ്ദാക്കിയതിനു പിന്നാലെ ശ്രീനഗര്‍ സിവില്‍ സെക്രട്ടറിയേറ്റ് കെട്ടിടത്തില്‍ നിന്ന് സംസ്ഥാന പതാക നീക്കം ചെയ്തു. ഇനി ഈ കെട്ടിടത്തില്‍ ദേശീയ പതാക മാത്രമായിരിക്കും പറക്കുക.
സ്വാതന്ത്ര്യ ലബ്ധിക്കുശേഷം ഉണ്ടായിരുന്ന സ്വയംഭരണാവകാശം ജമ്മു കശ്മിരില്‍ നിന്ന് എടുത്തുകളഞ്ഞ സാഹചര്യത്തിലാണ് പ്രത്യേക പതാക ഉയര്‍ത്താനുള്ള അവകാശവും അവര്‍ക്ക് നഷ്ടമായത്.
ദേശീയ പതാകക്കു പുറമെ സംസ്ഥാനത്തിന്റെ സ്വന്തം പതാക ഉയര്‍ത്താനും കശ്മിരിന് സ്വാതന്ത്ര്യമുണ്ടായിരുന്നു.
ജമ്മു, കശ്മിര്‍ താഴ്്‌വര, ലഡാക്ക് എന്നിവയെ പ്രതിനിധാനം ചെയ്ത് ചുവന്ന പ്രതലത്തില്‍ മൂന്ന് വെളുത്ത വരകളുള്ള പതാകയായിരുന്നു ജമ്മു കശ്മിരിനുണ്ടായിരുന്നത്. ഈ പതാകയില്‍ കാര്‍ഷിക വൃത്തിയെ പ്രതിനിധീകരിച്ചുള്ള ചിഹ്‌നവും ഉണ്ടായിരുന്നു.
സംസ്ഥാന പതാകക്കൊപ്പം ദേശീയ പതാകയും അവിടെ ഉയര്‍ത്തിയിരുന്നു. 1952 മുതലാണ് പതാകക്ക് ഔദ്യോഗിക പദവി ലഭിച്ചത്. സര്‍ക്കാര്‍ ഓഫിസുകളിലും മറ്റും സംസ്ഥാന പതാകയായിരുന്നു ഉയര്‍ത്തിയിരുന്നത്. കശ്മിരിനുള്ള പ്രത്യേക പദവി എടുത്തുകളഞ്ഞതോടെ ഈ പതാകയും അസാധുവായി.