ആളൂര്‍: ദുലീപ് ട്രോഫി മത്സരത്തിലെ രണ്ടാമിന്നിങ്‌സില്‍ ഇന്ത്യ ബ്ലൂവിനെതിരേ തകര്‍പ്പന്‍ സെഞ്ചുറിയുമായി മലയാളി താരം കരുണ്‍ നായര്‍. ഇന്നലെ താരം പുറത്താവാതെ 166 റണ്‍സാണ് സ്വന്തമാക്കിയത്. ആദ്യ ഇന്നിങ്‌സില്‍ താരത്തിന് ഒരു റണ്‍സകലെ സെഞ്ചുറി നഷ്ടമായിരുന്നു. പക്ഷേ മത്സരം സമനിലയില്‍ കലാശിച്ചു. ഇതോടെ ഒന്നാമിന്നിങ്്‌സ് ലീഡ് സ്വന്തമാക്കിയ ഇന്ത്യ റെഡ് മൂന്ന് പോയിന്റുകള്‍ നേടി. ഇന്ത്യ ബ്ലൂവിന് ഒരു പോയിന്റ് മാത്രമാണ് ലഭിച്ചത്. സ്‌കോര്‍ ഇന്ത്യ റെഡ് 285, ആറിന് 297, ഇന്ത്യ ബ്ലൂ 255. ഒന്നാമിന്നിങ്‌സില്‍ 30 റണ്‍സ് ലീഡ് നേടിയതിന്റെ ആത്മവിശ്വാസത്തില്‍ രണ്ടാമിന്നിങ്‌സ് ബാറ്റിങിനിറങ്ങിയ ഇന്ത്യ റെഡിന് വേണ്ടി മൂന്നാമനായിറങ്ങിയ കരുണ്‍ നായര്‍ മികച്ച പ്രകടനമാണ് പുറത്തെടുത്തത്. 223 പന്തില്‍ 19 ബൗണ്ടറികളും ഒരു സിക്‌സറുമടക്കമാണ് 166 റണ്‍സ് എടുത്തത്. 64 റണ്‍സെടുത്ത അങ്കിത് കള്‍സിയും റെഡിന് വേണ്ടി തിളങ്ങി.