കൂത്തുപറമ്പ്: ലക്‌നൗയില്‍ നടക്കുന്ന സീനിയര്‍ ഓപണ്‍ നാഷണല്‍ അത്‌ലറ്റിക് ചാംപ്യന്‍ഷിപ്പില്‍ പങ്കെടുക്കാനുള്ള തയാറെടുപ്പിലാണ് കീഴത്തൂരിലെ സുഗിന. ദേശീയ സീനിയര്‍ അത്‌ലറ്റിക് മീറ്റില്‍ 100 മീറ്റര്‍ ഹര്‍ഡില്‍സില്‍ സ്വര്‍ണ മെഡല്‍ നേടിയാണു സുഗിന രാജ്യത്തിന്റെ അഭിമാനമായി മാറിയത്. സെപ്തംബര്‍ 30നു ലക്‌നൗവില്‍ നടക്കുന്ന സീനിയര്‍ ഓപണ്‍ നാഷണല്‍ ചാംപ്യന്‍ഷിപ്പില്‍ മെഡല്‍ നേടാന്‍ കഠിന പ്രയത്‌നത്തിലാണ് താരം. ഹര്‍ഡില്‍സിനു പുറമേ 100 മീറ്റര്‍ ഓട്ടം, 4 ത 100 മീറ്റര്‍ റിലേ എന്നീ ഇനങ്ങളിലും സുഗിന നേട്ടങ്ങള്‍ കൈവരിച്ചിട്ടുണ്ട്. തൃശൂര്‍ വിമലാ കോളജിലെ അവസാന വര്‍ഷ ബിരുദാനന്തര ബിരുദ വിദ്യാര്‍ഥിനിയാണ്. കീഴത്തൂര്‍ വെസ്റ്റ് എല്‍.പി സ്‌കൂളില്‍ നിന്നു കായിക രംഗത്തേക്കു ചുവടുവച്ചിരുന്നു. മമ്പറം യു.പി സ്‌കൂളിലെ പഠനത്തിനു ശേഷം കണ്ണൂരിലെ സ്‌പോര്‍ട്‌സ് ഡിവിഷന്‍ സ്‌കൂളില്‍ ചേര്‍ന്നതോടെയാണ് മികച്ച രീതിയില്‍ പ്രാക്ടീസ് ചെയ്യാന്‍ സാധിച്ചതെന്ന് സുഗിന പറയുന്നു. സ്‌പോര്‍ട്‌സ് ഡിവിഷന്‍ സ്‌കൂളിലെ അധ്യാപകന്‍ ടോമി ചെറിയാനാണ് സുഗിനയ്ക്ക് ഹഡില്‍സിലേക്കുള്ള വഴി തുറന്നത്. സ്‌പോര്‍ട്‌സ് കൗണ്‍സില്‍ കോച്ച് ആര്‍ ജയകുമാറാണ് ഇപ്പോഴത്തെ പരിശീലകന്‍. വരാനിരിക്കുന്ന ചാംപ്യന്‍ഷിപ്പില്‍ മികച്ച നേട്ടം കൈവരിക്കാനാവുമെന്ന പ്രതീക്ഷയിലാണ് സുഗിന.