യാങ്കോണ്‍: 122 യാത്രക്കാരുമായി കാണാതായ മ്യാന്മര്‍ സൈനിക വിമാനത്തിന്റെ അവശിഷ്ടങ്ങളും മൃതദേഹങ്ങളും കണ്ടെത്തിയതായി ബര്‍മീസ് സൈനിക വൃത്തങ്ങള്‍ അറിയിച്ചു. എട്ടു കുട്ടികളും 20 സ്ത്രീകളുമടക്കം 29 പേരുടെ മൃതദേഹങ്ങള്‍ കണ്ടെത്തിയിട്ടുണ്ട്.
ആന്തമാന്‍ കടലില്‍നിന്നാണ് ഇവ കണ്ടെത്തിയത്. തീരനഗരമായ ദവെയുടെ ഭാഗത്തുവച്ചാണ് അവശിഷ്ടങ്ങള്‍ കണ്ടെത്തിയത്. വിമാനത്തിലുണ്ടായിരുന്ന എല്ലാവരും മരിച്ചതായി കരുതുന്നതായി സര്‍ക്കാര്‍ വൃത്തങ്ങള്‍ അറിയിച്ചു. കൂടുതല്‍ പേര്‍ക്കായി തിരച്ചില്‍ ശക്തമാക്കിയിരിക്കുകയാണ്.
ബുധനാഴ്ച ഉച്ചയ്ക്കാണ് മ്യാന്മറിന്റെ ദക്ഷിണ നഗരമായ യീക്കിന്റെയും യാങ്കോണിന്റെയും ഇടയില്‍ വിമാനം റഡാറില്‍നിന്ന് അപ്രത്യക്ഷമായത്. 106 യാത്രക്കാരും 14 ജീവനക്കാരുമാണ് ഈ സമയത്ത് വിമാനത്തിലുണ്ടായിരുന്നത്. കൂടുതല്‍ പേരും സൈനികരും അവരുടെ ബന്ധുക്കളുമായിരുന്നു.