ചെറുപുഴ: പേപ്പട്ടിയുടെ കടിയേറ്റ രണ്ടു പശുക്കിടാവുകള്‍ക്കു പേ ഇളകി. കാരോക്കാട്ടേ തടത്തില്‍ മാധവി, കലശപ്പുരയില്‍ ഉണ്ണിക്കൃഷ്ണന്‍ എന്നിവരുടെ പശുക്കിടാവുകള്‍ക്കാണ് പേ ഇളകിയത്.
വായില്‍ നുരയും പതയും ഒഴുകാന്‍ തുടങ്ങിയത് ശ്രദ്ധയില്‍പെട്ട വീട്ടുകാര്‍ ഡോക്ടറെ വിവരമറിയിച്ചു പരിശോധന നടത്തിയ ശേഷമാണ് പേ ഇളകിയതാണെന്നു മനസിലായത്.
തുടര്‍ന്നു മാധവിയുടെ പശുക്കിടാവിനെ മരുന്ന് കുത്തിവച്ചു കൊന്നു. മറ്റൊന്നിനെ മരുന്ന് ഇല്ലാത്തതിനാല്‍ കുത്തിവയ്ക്കാനായില്ല.
പശുക്കിടാവ് തീറ്റയെടുക്കാതെ നിര്‍ത്താതെ കരയുകയാണ്. നാളുകളായി ചെറുപുഴയിലും പരിസര പ്രദേശങ്ങളിലും തെരുവുനായ ശല്യം രൂക്ഷമാണ്.
തെരുവുനായകളെ പിടികൂടുന്നതിനു അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.