മഞ്ചേരി: കഞ്ചാവ് വില്‍പ്പനെയെക്കുറിച്ച് എക്‌സൈസ് അധികൃതര്‍ക്ക് വിവരം നല്‍കിയ യുവാവിനെ സിമന്റ് കട്ടകൊണ്ട് തലക്കെറിഞ്ഞ് കൊലപ്പെടുത്തിയ കേസില്‍ പ്രതികള്‍ കുറ്റക്കാരെന്ന് കോടതി കണ്ടെത്തി.
നിലമ്പൂര്‍ സ്വദേശി നുസ്‌റത്തുല്ലയെ കൊലപ്പെടുത്തിയ സംഭവത്തിലാണ് തമിഴ്‌നാട് കന്യാകുമാരി എരണിയില്‍ പ്‌ളാക്കോട് രാജ്കുമാര്‍ എന്ന കോമള കണ്ണന്‍(35), സുഹൃത്തായ കോയമ്പത്തൂര്‍ ചെട്ടിപ്പാളയം പോത്തന്നൂര്‍ കലൈഞ്ജര്‍ നഗര്‍ സുരേന്ദ്രന്‍ എന്നിവര്‍ കുറ്റക്കാരാണെന്ന് മഞ്ചേരി രണ്ടാം അഡീഷനല്‍ സെഷന്‍സ് കോടതി കണ്ടെത്തിയത്. ശിക്ഷ തിങ്കളാഴ്ച വിധിക്കും.
2016 ആഗസ്റ്റ് 19നാണ് കേസിനാസ്പദമായ സംഭവം. വ്യക്തി വൈരാഗ്യത്തെ തുടര്‍ന്ന് പ്രതികള്‍ചേര്‍ന്ന് അമരമ്പലം അഞ്ചാംമൈല്‍ മഞ്ഞത്തൊടിക നുസ്‌റത്തുല്ല എന്ന ചെറിയാപ്പു(34)വിനെ സിമന്റ് കട്ടകൊണ്ട് തലക്കെറിഞ്ഞ് കൊലപ്പെടുത്തിയെന്നാണ് കേസ്.
നിലമ്പൂര്‍ അരുവാക്കോട് കോടതിപ്പടിയിലെ ബാര്‍ ഹോട്ടലിന്റെ വരാന്തയില്‍ നുസ്‌റത്തുല്ലയെ തലപൊട്ടി ചോരവാര്‍ന്ന് മരിച്ച നിലയില്‍ കണ്ടെത്തുകയായിരുന്നു. സംഭവത്തിന് ഒരുമാസം മുന്‍പ് കേസിലെ ഒന്നാം പ്രതി രാജ്കുമാറും നുസ്‌റത്തുല്ലയും തമ്മില്‍ കൈയേറ്റം നടന്നിരുന്നു.
സുരേന്ദ്രന്‍ കഞ്ചാവ് വില്‍പ്പന നടത്തുന്ന വിവരം നുസ്‌റത്തുല്ല എക്‌സൈസ് അധികൃതര്‍ക്ക് കൈമാറിയതിലുള്ള വിരോധമാണ് കൊലപാതകത്തില്‍ കലാശിച്ചത്. പ്രോസിക്യൂഷന്‌വേണ്ടി അഡ്വ. ബാലകൃഷ്ണന്‍ ഹാജരായി.