തിരുവനന്തപുരം: കാറപകടത്തില്‍ മരിച്ച വയലിനിസ്റ്റ് ബാലഭാസ്‌കറിന്റെ ഭാര്യ ലക്ഷ്മി സംസാരിച്ചു തുടങ്ങിയതായി ആശുപത്രി അധികൃതര്‍. കഴിഞ്ഞ മാസമുണ്ടായ അപകടത്തില്‍ ലക്ഷ്മിക്ക് ഗുരുതരമായി പരുക്കേറ്റിരുന്നു.
ബാലഭാസ്‌കറിനൊപ്പം മകള്‍ തേജസ്വിനി ബാലയും മരിച്ചിരുന്നു. തിരുവനന്തപുരത്ത് സ്വകാര്യ ആശുപത്രിയില്‍ ചികിത്സയില്‍ കഴിയുന്ന ലക്ഷ്മിയെ തീവ്രപരിചരണ വിഭാഗത്തില്‍ നിന്ന് മുറിയിലേക്ക് മാറ്റി.
പരുക്കുകള്‍ ഭേദമായി വരികയാണെന്നും മുറിവുകള്‍ ഉണങ്ങാന്‍ അല്‍പം കൂടി സമയമെടുക്കുമെന്നും ഡോക്ടര്‍മാര്‍ പറഞ്ഞു. ലക്ഷ്മിയെ കാണാന്‍ നിരവധി ആളുകള്‍ എത്തുന്നത് ചികിത്സയ്ക്ക് ബുദ്ധിമുട്ട് സൃഷ്ടിക്കുന്നുണ്ട്. ഇപ്പോള്‍ സന്ദര്‍ശകര്‍ക്ക് നിയന്ത്രണം ഏര്‍പ്പെടുത്തിയിട്ടുണ്ട്.
ആരെയെങ്കിലും കാണുകയോ സംസാരിക്കണമെന്നോ ലക്ഷ്മി ആവശ്യപ്പെട്ടാല്‍ മാത്രമേ സന്ദര്‍ശകരെ അനുവദിക്കുന്നുള്ളു. ബാലഭാസ്‌കറിന്റെയും മകളുടേയും മരണത്തെ കുറിച്ച് പിന്നീടാണ് ലക്ഷ്മിയെ അറിയിച്ചത്. യാഥാര്‍ഥ്യങ്ങളോട് ലക്ഷ്മി പൊരുത്തപ്പെട്ടു വരികയാണെന്നു ബന്ധുക്കള്‍ പറഞ്ഞു.