സാറ മുഹമ്മദ്

നെടുമങ്ങാട്: കേരള തമിഴ്‌നാട് അതിര്‍ത്തി വന മേഖലകളില്‍ മൃഗ വേട്ട കൊഴുക്കുന്നു. പൊലിസ്, വനം വകുപ്പ് ഉദ്യോഗസ്ഥര്‍ അടക്കമുള്ളവരും ഉള്‍പ്പെടുന്ന വേട്ടസംഘങ്ങള്‍ ആണ് അതിര്‍ത്തി വനമേഖലകളില്‍ താവളമുറപ്പിക്കുന്നത്. തിരുവനന്തപുരം, കൊല്ലം ജില്ലകളുടെ അതിര്‍ത്തി മേഖലകള്‍ പങ്കിടുന്ന കുളത്തൂപ്പുഴ, പാലോട്, ഫോറസ്റ്റ് റേഞ്ച് പരിധിയില്‍ വരുന്ന ഉള്‍വനങ്ങളിലാണ് വേട്ട സംഘങ്ങളുടെ താവളം.
ചില വന മേഖലകളില്‍ പകലും വിനോദ സഞ്ചാരമേഖല ഉള്‍പ്പെടുന്ന വനാന്തര്‍ ഭാഗങ്ങളില്‍ രാത്രി കാലങ്ങളിലുമാണ് വേട്ട നടക്കുന്നത്. മ്ലാവ്, മാന്‍, കാട്ടുകോഴി, മുയല്‍, കേഴ, കാട്ടുപോത്തു, കാട്ടുപന്നി തുടങ്ങിയ മൃഗങ്ങളാണ് വേട്ടക്കാരുടെ സ്ഥിരം വേട്ടമൃഗം. വേട്ടയാടുന്ന മൃഗത്തിന്റെ മാംസം ആവശ്യക്കാര്‍ക്ക് എത്തിച്ചു കൊടുക്കാനും ഇടനിലക്കാരുണ്ടെന്നാണ് അറിയുന്നത്.
ഇത്തരത്തിലുള്ള നിരവധി കേസുകളാണ് നേരത്തെ പിടിച്ചിട്ടുള്ളത്. ഇതില്‍ അവസാനത്തേതാണ് എസ്.ഐയും പൊലിസുകാരും വേട്ടക്കാരും അടക്കമുള്ളവര്‍ വേട്ടയാടിയ വന്യ മൃഗത്തിന്റെ മാംസവും വേട്ടയാടാന്‍ ഉപയോഗിച്ച തോക്കും ആയുധങ്ങളും പിടികൂടിയത്. ഈ സംഭവത്തില്‍ രണ്ടു മാസം ആകാറായിട്ടും പ്രതികളായ ഒളിവില്‍ പോയ പൊലിസുകാരെ അറസ്റ്റ് ചെയ്യാന്‍ കഴിഞ്ഞിട്ടില്ല. പ്രതികളുടെ ലുക്ക് ഔട്ട് നോട്ടീസ് കഴിഞ്ഞ ദിവസം പുറത്തിറക്കിയെങ്കിലും ഒരു ഉപയോഗവും ഉണ്ടായിട്ടില്ല. കഴിഞ്ഞ സെപ്റ്റംബര്‍ ഏഴിനാണ് പൊന്മുടി പൊലിസ് സ്റ്റേഷനിലെ ഗ്രേഡ് എസ്.ഐ അയ്യൂബ്, സിവില്‍ പൊലിസ് ഓഫിസര്‍ രാജീവ്, പൊലിസ് ഡ്രൈവര്‍ വിനോദ്, കൊല്ലായിലെ പോസ്റ്റ് ഓഫിസിലെ പോസ്റ്റ്മാസ്റ്റര്‍ മനു, കുളത്തൂപ്പുഴ മൈലമൂട്ടിലെ വേട്ടക്കാരായ മറ്റു മൂന്നുപേരും ചേര്‍ന്നാണ് പൊന്മുടി വനമേഖലയില്‍ മ്ലാവിനെ വേട്ടയാടിയത്.
പൊലിസ് ജീപ്പിലിരുന്ന് മ്ലാവിനെ വെടിവെച്ചു വീഴ്ത്തിയത് മനു ആയിരുന്നു. ചത്തുവീണ മ്ലാവിനെ സംഘം പൊലിസ് ജീപ്പില്‍ തന്നെ വനത്തില്‍ നിന്നും പുറത്തെത്തിച്ചു വെട്ടിനുറുക്കി മാംസമാക്കി പങ്കിട്ടെടുക്കുകയായിരുന്നു. രഹസ്യ വിവരത്തിന്റെ അടിസ്ഥാനത്തില്‍ വനം വകുപ്പ് ഉദ്യോഗസ്ഥര്‍ നടത്തിയ അന്വേഷണത്തില്‍ വേട്ടക്കുപയോഗിച്ച തോക്കുകള്‍, കത്തികള്‍, കടത്താന്‍ ഉപയോഗിച്ച വാഹനം പൊലിസുകാരും സര്‍ക്കാര്‍ ജീവനക്കാരും ഒഴികയുള്ള മറ്റു പ്രതികള്‍ പിടിയിലായിരുന്നു.
എന്നാല്‍ ഒളിവില്‍ പോയ എസ്.ഐ അടക്കമുള്ള പൊലിസുകാരും സര്‍ക്കാര്‍ ജീവനക്കാരനെയും പിടികൂടാന്‍ ഇതുവരെയും വനപാലകര്‍ക്കായിട്ടില്ല. സംഭവം വിവാദമായത്തോടെ രണ്ടാഴ്ച മുന്‍പ് പൊലിസ് ജീപ്പ് ഹാജരാക്കി അധികൃതര്‍ മുഖം രക്ഷിക്കുകയായിരുന്നു. നേരത്തെയും നിരവധി മൃഗ വേട്ട കേസുകള്‍ പിടിച്ചിട്ടുണ്ടെങ്കിലും പിടിക്കുന്നിടത്തു തന്നെ അന്വേഷണം അവസാനിക്കുന്ന അവസ്ഥയാണ് ഉള്ളത്. ഇത് മൃഗവേട്ട വീണ്ടും ശക്തമാകാന്‍ കാരണമാകുന്നു. ഇതില്‍ പല കേസുകളും പുറംലോകം അറിയാതെ ഒത്തു തീര്‍ത്ത് അവസാനിപ്പിക്കുന്നതും നിരവധിയാണ്. വനപാലക സംഘങ്ങളും വേട്ടക്കാരും തമ്മിലുള്ള അവിശുദ്ധ കൂട്ടുകെട്ടിന്റെ ഫലമാണ് അതിര്‍ത്തി വനമേഖലയില്‍ വെടിയൊച്ചകള്‍ നിലക്കാത്തതെന്നാണ് നാട്ടുകാരുടെയും ആദിവാസികളുടെയും അഭിപ്രായം.