കാട്ടാക്കട: ബൈക്കിനെ ചൊല്ലിയുണ്ടായ വഴക്കില്‍ കൂട്ടുകാരന്റെ കൈ തല്ലിയൊടിച്ചെന്ന കേസില്‍ രണ്ടുപേരെ വിളപ്പില്‍ശാല പൊലിസ് അറസ്റ്റുചെയ്തു. പ്രതികളിലൊരാളുടെ ബൈക്ക് ഉപയോഗിച്ചു കേടുവരുത്തിയതിനാണ് കഴിഞ്ഞ 18ന് രാത്രി മലയിന്‍കീഴ് മഞ്ചാടി എല്‍.പി.എസിനു സമീപം ശ്രീലയം വീട്ടില്‍ എസ്. ശ്രീകാന്തി(23)നെ സംഘംചേര്‍ന്ന് ആക്രമിച്ചത്.
കേസില്‍ വിട്ടിയം കാര്‍മല്‍ സ്‌കൂളിനു സമീപം ഫാത്തിമ മന്‍സിലില്‍ എ. അസീം(24) അറസ്റ്റിലായി. വിളപ്പില്‍ പഞ്ചായത്ത് അംഗത്തിന്റെ മകനാണ് അസീം. മലയിന്‍കീഴ് മഞ്ചാടി ഗോപികനിവാസില്‍നിന്ന് ഇരട്ടക്കലുങ്ക് കോളച്ചിറ മഹേഷ് നിവാസില്‍ താമസിക്കുന്ന പി. മിഥുനാ(24)ണ് കേസില്‍ അറസ്റ്റിലായ മറ്റൊരാള്‍. അസീമിന്റെ ബൈക്കാണ് ശ്രീകാന്ത് നിരന്തരം ഉപയോഗിച്ചിരുന്നതെന്ന് പൊലിസ് പറഞ്ഞു.
രാത്രി ബൈക്കില്‍ ഹോട്ടല്‍ജോലിക്കു പോയ ശ്രീകാന്തിനെ അറസ്റ്റിലായവരുള്‍പ്പെടെ അഞ്ചംഗ സംഘമാണ് ആക്രമിച്ചത്. ഇരുമ്പുകമ്പികൊണ്ടുള്ള അടിയില്‍ ഇടതു കൈയുടെ എല്ലിന് പൊട്ടലുണ്ടായി.
ഹെല്‍മെറ്റ് തകരുകയും ചെയ്തു. വിളപ്പില്‍ശാല എസ്.ഐ ഷിബു പ്രതികളെ അറസ്റ്റുചെയ്ത് കോടതിയില്‍ ഹാജരാക്കി. പ്രതികളെ കോടതി റിമാന്‍ഡ് ചെയ്തു.