പാരിസ്: യുവേഫ ചാംപ്യന്‍സ് ലീഗില്‍ ബാഴ്‌സലോണ, ലിവര്‍പൂള്‍, ബൊറൂസിയ ഡോട്മുണ്ടണ്ട് ടീമുകള്‍ക്ക് തകര്‍പ്പന്‍ ജയം. ഗ്രൂപ്പ് ബിയില്‍ നടന്ന മത്സരത്തിലാണ് ഇന്റര്‍മിലാനെ എതിരില്ലാത്ത രണ്ട് ഗോളുകള്‍ക്ക് ബാഴ്‌സലോണ തകര്‍ത്തത്. സൂപ്പര്‍ താരം മെസ്സിയുടെ അഭാവത്തിലും ബാഴ്‌സ മികച്ച പ്രകടനമാണ് കാഴ്ചവച്ചത്. ഇന്റര്‍മിലാന് ബാഴ്‌സയുടെ ഗോള്‍മുഖത്ത് കാര്യമായ ഭീഷണി വിതക്കാന്‍ പോലുമായില്ല. റഫീഞ്ഞ, ജോര്‍ഡി ആല്‍ബ എന്നിവരാണ് ബാഴ്‌സയ്ക്കായി ഗോളുകള്‍ നേടിയത്.
ലിവര്‍പൂള്‍ 4-0ന് റെഡ് സ്റ്റാര്‍ ബെല്‍ഗ്രേഡിനെയും ബൊറൂസിയ ഡോട്മുണ്ട് 4-0 ന് ശക്തരായ അത്‌ലറ്റികോ മാഡ്രിഡിനെയും തകര്‍ത്തു. മറ്റൊരു മത്സരത്തില്‍ പി.എസ്.ജി നാപോളിക്കെതിരേ 2-2ന്റെ സമനിലയുമായി രക്ഷപ്പെട്ടു. ടോട്ടനത്തെ പി.എസ്.വി ഐന്തോവന്‍ 2-2ന്റെ സമനിലയില്‍ തളച്ചു.
ഡോട്മുണ്ടണ്ടിന്റെ തട്ടകത്തില്‍ നടന്ന മത്സരത്തില്‍ റാഫേല്‍ ഗ്വരെയ്‌റോ ഇരട്ട ഗോളും ആക്‌സല്‍ വിറ്റ്‌സെല്‍, ജാഡോന്‍ സാഞ്ചോ ഓരോ തവണയും ലക്ഷ്യംകണ്ടു. എന്നാല്‍, ഫ്രഞ്ച് ഗ്ലാമര്‍ ടീമായ മൊണാക്കോയെ 1-1ന് ബെല്‍ജിയം ക്ലബ്ബായ ക്ലബ്ബ് ബ്രഗ്ഗെ സമനിലയില്‍ തളയ്ക്കുകയായിരുന്നു. ഗ്രൂപ്പില്‍ ഒന്‍പത് പോയിന്റുമായി ഡോട്മുണ്ടണ്ടാണ് ഒന്നാം സ്ഥാനത്ത്. ആറ് പോയിന്റുമായി അത്‌ലറ്റികോ രണ്ടാം സ്ഥാനത്തും നില്‍ക്കുന്നു.
ഗ്രൂപ്പ് സിയില്‍ ലിവര്‍പൂള്‍ വിജയവഴിയില്‍ തിരിച്ചെത്തി. ലിവര്‍പൂളിന്റെ തട്ടകത്തില്‍ നടന്ന മത്സരത്തില്‍ എതിരില്ലാത്ത നാല് ഗോളുകള്‍ക്കാണ് സെര്‍ബിയന്‍ ക്ലബ്ബായ റെഡ് സ്റ്റാര്‍ ബെല്‍ഗ്രേഡിനെ തകര്‍ത്തത്. ലിവര്‍പൂളിനായി മുഹമ്മദ് സലാഹ് ഇരട്ട ഗോളുമായി തിളങ്ങി. ഇതോടെ ലിവര്‍പൂളില്‍ സലാഹ് 50 ഗോളുകള്‍ പൂര്‍ത്തിയാക്കുകയും ചെയ്തു. റോബര്‍ട്ടോ ഫിര്‍മിനോ, സാഡിയോ മാനെ എന്നിവര്‍ ഓരോ തവണ ലിവര്‍പൂളിനായി ലക്ഷ്യം കണ്ടു. ഗ്രൂപ്പ് ഡിയില്‍ പോര്‍ട്ടോ 3-1ന് ലൊകോമൊട്ടിവിനെ പരാജയപ്പെടുത്തിയപ്പോള്‍ ഗാലത്‌സറെ ഷാല്‍ക്കെ മത്സരം ഗോള്‍രഹിതമായി അവസാനിച്ചു.